Эман Хассан Лавва дәстүрлі палестиналық киімін киген, ал Хикмет Лавва костюм киді; Олар өздері секілді киінген басқа жұптармен бірге Газаның қираған ғимараттары арасынан қол ұстасып өтті.
27 жастағы екі палестиналық сейсенбі күні блокададағы анклавта өткен жаппай үйлену тойында 54 жұптың қатарында болды. Бұл оқиға екі жылдық қатігез геноцидтен кейін сирек кездесетін үміт сәтін білдіреді.
«Қазіргі жағдайға қарамастан біз жаңа өмірді бастаймыз», — деді Лавва. «Құдай қаласа, бұл соғыстың аяқталуы болсын».
Неке қию — палестиналық мәдениеттің маңызды бөлігі, ал Израильдің қыспағы кезінде Газада мұндай тойлар сирек өтті. Атысты уақытша тоқтату жағдайында бұл дәстүр қайта жандана бастады, дегенмен тойлар бұрынғыдай шаттықпен өтпейді.
Хан-Юнус қаласында палестиналықтар ту көтеріп, той тойлады, алайда Газа көлеміндегі дағдарыс мерекеге көлеңке түсірді.
Газадағы 2 миллионнан астам тұрғынның басым бөлігі, соның ішінде Эман мен Хикмет те Израильдің шабуылы салдарынан жерлерінен көшіп кетті, қалаларының көбі шабуылға ұшырады, мекендері қиратылды.
Көмектің жетіспеуі мен зорлық-зомбылық кесірінен адамдардың күнделікті өмірі әлі күнге дейін ауыр.
«Біз басқа жұрттай бақытты болғымыз келеді. Бұрын үйім, жұмысым болсын деп армандайтынмын, баршаға ұқсап өмір сүргім келетін», — деді Хикмет,- «Ал бүгінгі арманым — тұратын палатка табу».
«Өмір біршама қалыпқа түсе бастады, бірақ әлі де біз ойлағандай емес», — деп қосты ол.
Тойды “Al Fares Al Shahim” қаржыландырды. Ұйым шараны өткізіп қана қоймай, жұптарға бірге өмір сүру үшін аз көлемде ақша және басқа да қажетті заттар ұсынды.
Газадағы топтық тойдың суреттері төменде:
