Әзербайжанда Франция азаматы тыңшылық айыбымен 10 жылға сотталды
Бакудегі сот әскери ынтымақтастық пен барлау қызметіне қатысты тыңшылық айыптары бойынша Франция азаматы 10 жылға сотталды.
Ресейдің мемлекеттік “РИА” агенттігінің хабарлауынша, Әзербайжандағы сот Франция азаматы Мартин Райанды Париждің пайдасына тыңшылық жасады деген айыппен дүйсенбі күні 10 жылға бас бостандығынан айырды.
2023 жылы желтоқсанда ұсталған Райан Әзербайжанның Түркия және Пәкістанмен жүргізіп отырған әскери ынтымақтастығы туралы құпия ақпарат жинады деп айыпталып отыр.
Баку сондай-ақ Райанның француз барлауымен жұмыс істеу үшін француз тілінде сөйлейтін Әзербайжан азаматтарын тартуға әрекеттенгенін мәлімдеді.
Райан өзіне тағылған айыптарды жартылай мойындады.
Осы айдың басында Франция президенті Эммануэль Макрон мен Әзербайжан президенті Ильхам Әлиев телефон арқылы екіжақты қарым-қатынастар мен ынтымақтастық мүмкіндіктерін талқылады.
Әлиев қазан айында Копенгагенде Макронмен кездескеннен кейін екі ел арасындағы «өткендегі түсініспеушіліктер жойылғанын» хабарлаған болатын.