Индонезияда көшкіннен қаза тапқандар саны 70-ке жетті
Батыс Явадағы іздеу-құтқару жұмыстарына 3 мыңнан астам қызметкер тартылған.
Индонезияда өткен аптада болған жер көшкіні салдарынан қаза тапқандар саны 70-ке жетті. Ал Батыс Ява провинциясында жоғалған 10 адамды іздеу-құтқару жұмыстары тоғызыншы күн қатарынан жалғасып жатыр. Бұл туралы мемлекеттік “Antara News” агенттігі хабарлады.
Билік өкілдерінің мәліметінше, сенбі күні оқиға орнынан тағы 10 адамның мәйіті табылып, осылайша қаза тапқандар саны 70-ке жеткені ресми түрде расталды. Бандунг іздеу және құтқару агенттігінің басшысы Аде Диан Пермана шамамен 10 адамның әлі де хабар-ошарсыз кеткенін айтты.
Пермана жексенбі күні де іздестіру жұмыстары із кесуші иттер мен ауыр техника көмегімен жалғасқанын, жалпы саны 3 713 қызметкердің операцияға қатысып жатқанын мәлімдеді.
Қазіргі уақытқа дейін 49 адамның жеке басы анықталып, мәйіттері отбасыларына тапсырылған. Ал 78 адам тірі күйінде құтқарылған.
Жер көшкіні өткен сенбі күні Батыс Бандунг аймағындағы бір ауылды басып, көптеген үйді балшық пен қирандылардың астында қалдырған.
Жер бедері күрделі аймақта іздеу-құтқару жұмыстары әлі де жалғасуда.