Украина премьер-министрінің орынбасары Алексей Кулеба Ресейдің Украинаның Қаратеңіз жағалауындағы Одесса порттарының біріне ұшқышсыз ұшу аппаратымен жасаған шабуылынан 1 адамның қаза тауып, 6 адамның жараланғанын мәлімдеді.
Кулеба жұма күні “Telegram” арнасында жасаған мәлімдемесінде «Ресей порт және теміржол инфрақұрылымына қарқынды шабуылдар жасады», — деп атап өтті.
Кулеба шабуылдың бір кәсіпорынның инфрақұрылымына, тыңайтқыш қоймаларына және жүк вагондарына зақым келтіріп, өрттің шығуына себеп болғанын хабарлады.
Украина премьер-министрінің орынбасары порттың атын атаған жоқ. Одесса қаласының айналасындағы және Қаратеңіз жағалауында орналасқан үш порттағы нысандар жиі нысанаға алынады, бұл аймақта сондай-ақ Дунай өзеніндегі порттар да бар.
Одесса облысының әкімі Олег Кипер аймақтағы энергетикалық, өнеркәсіптік және тұрғын үй инфрақұрылымдары да шабуылдардың нысанасы болғанын айтты.
Бұған дейін Кипер шабуылдың электр энергиясымен, жылумен және сумен қамтамасыз етуде «елеулі» іркілістер тудырғанын хабарлаған болатын.
Кулеба сонымен қатар Днепропетровск облысындағы теміржол инфрақұрылымының да нысанаға алынғанын мәлімдеді.
