Түрік қауіпсіздік дереккөздерінің мәліметінше, Түркия Республикасының Ұлттық барлау ұйымы АҚШ пен Иран арасындағы шиеленісті азайту үшін 1көлеңкелі дипломатия1 аясында белсенді жұмыс істеді. Бұл жағдай Анкараның аймақтық тұрақтандырушы ретіндегі рөлінің артып келе жатқанын көрсетеді.
Дереккөздерге сүйенсек, Ұлттық барлау ұйымы ықтимал бітім процесін жеңілдету және қақтығыстың одан ары өршуіне жол бермеу мақсатында Президент әкімшілігінің нұсқауларына сәйкес бірнеше мемлекеттік мекемемен тығыз үйлесімде жұмыс істеген.
Қақтығыстар ушықпай тұрып, ұйым соғыстың басталуын болдырмау үшін барлық тараптармен қарқынды дипломатиялық байланыс орнатты. Соғыс басталған соң Ұлттық барлау ұйымы екі тараппен де сөйлесе алу қабілетін пайдаланып, ашық байланыс арналарын қамтамасыз етті.
Түрік ресми өкілдері барлау ұйымының ең алдымен қақтығыстың аймаққа жайылуының алдын алуға, тараптар арасындағы түсініспеушіліктерді азайтуға және шиеленісті бәсеңдетуге бағытталған жолдауларды жеткізуге назар аударғанын атап өтті.
Ұлттық барлау ұйымы қақтығысқа тікелей қатысушы тараптардан бөлек Ирак, Пәкістан, Катар, Біріккен Араб Әмірліктері, Сауд Арабиясы, Кувейт, Мысыр, Ұлыбритания, Германия, Франция және Италия сияқты елдермен келіссөз жүргізіп, Түркияның аймақтық қауіпсіздік архитектурасындағы орталық рөлін тағы бір мәрте айқындады.
Сонымен қатар Ұлттық барлау ұйымының Ислам революциясы сақшылары корпусына қатысы бар шенеуніктерді қоса алғанда, ирандық әріптестерімен тығыз байланыста болып, қақтығыстарды тоқтатуға бағытталған ұсыныстар мен хабарламалар жолдағаны белгілі болды.
Делдалдық талпыныстармен қатар ұйым Анкараның дағдарысқа қарсы кешенді әрекет ету тәсілін көрсете отырып, қақтығыс аймақтарынан эвакуациялау және гуманитарлық үйлестіру туралы өтініштерді орындауға күш салды.
Түрік билігі Ұлттық барлау ұйымының Ирандағы тұрақсыздықтың кең ауқымды этникалық шиеленіске ұласуына немесе Түркияның ішкі қауіпсіздік басымдықтарына нұқсан келтіруіне жол бермеу үшін тиісті қадамдар басқанын мәлімдеді.
