АҚШ президенті Дональд Трамп Иранмен келісімге қол жеткізілгенін жариялап, Ормуз бұғазының қайта ашылуына және АҚШ әскери-теңіз күштерінің қоршауын алып тастауға рұқсат бергенін мәлімдеді.
Трамп “Truth Social” платформасындағы жазбасында:
«Иран Ислам Республикасымен келісім енді толық аяқталды. Баршаңызды құттықтаймын!», – деп жазды.
Ол сондай-ақ: «Осы арқылы Ормуз бұғазының ешқандай төлемсіз толық ашылуына және бір мезгілде Америка Құрама Штаттарының әскери-теңіз күштері қоршауының дереу тоқтатылуына толық өкілеттік беремін», – деп қосты.
Трамп сондай- ақ: «Әлем кемелері, қозғалтқыштарыңызды іске қосыңдар. Мұнай ағылсын!», – деп жазды.
Алайда президент мәлімдемесінде келісімнің егжей-тегжейлері немесе қабылданған шараларды жүзеге асыру тәртібі туралы қосымша ақпарат берген жоқ.
«Дереу және тұрақты» бітім
Пәкістан премьер-министрі Шахбаз Шариф қарқынды келіссөздерден кейін дүйсенбі күні таңертең АҚШ пен Иран арасында бейбіт келісімге қол жеткізілгенін жариялады.
Шариф “X” әлеуметтік желісіндегі жазбасында: «Қарқынды келіссөздерден кейін Америка Құрама Штаттары мен Иран Ислам Республикасы арасында Бейбітшілік келісіміне ҚОЛ ЖЕТКІЗІЛГЕНІН қуана хабарлаймыз», – деп жазды.
Ол сондай-ақ: «Екі тарап та Ливанды қоса алғанда барлық бағытағы әскери операциялардың дереу және тұрақты түрде тоқтатылғанын жариялады», – деді.
Шарифтің айтуынша, келісімге ресми қол қою рәсімі 19 маусым күні Швейцарияда өтеді.
