Иран Вашингтонның Иран мұнайының саудасына қатысты санкцияларды уақытша тоқтату қадамынан бас тартуынан кейін екі жақ арасында қол қойылған бітімгершілік құжаты — Исламабад келісімінің «ашық» бұзылғанын мәлімдеді.
Иран Сыртқы істер министрлігі жасаған мәлімдемесінде АҚШ Қаржы министрлігінің бұл шешімі қол жеткізілген келісім мәтінінің 15-бабын «ашық түрде бұзу» болып табылатынын атап өтіп, оның салдарына Вашингтонды жауапты деп санады.
Министрлік келісімге қол қойылғаннан кейін 20 күн де өтпей жатып жасалған “бұл қадам АҚШ үкіметінің арам пиғылын, сенімсіздігін және өз міндеттемелерін орындамайтынын айқын көрсетті” деп мәлімдеді.
Министрліктің уәжінше, Иран «толықтай ізгі ниетпен» әрекет еткен және келісімге қол қойылған сәттен бастап құжат аясындағы міндеттемелерін орындау үшін барлық мүмкіндіктерін жұмылдырған.
Сондай-ақ ведомство Вашингтонды келісімді бірнеше рет бұзды деп айыптап, бұл заңсыздықтарды әртүрлі сылтаулармен ақтауға тырысып жатқанын білдірді. Бұған қоса, АҚШ-тың келісім шарттарын бұзуының салдары туралы ескертіп, Иран өз ұлттық мүдделері мен қауіпсіздігін қорғау үшін қажет деп тапқан кез келген шараны қабылдайтынын жеткізді.
АҚШ бірқатар соққы жасады
АҚШ Орталық қолбасшылығы (CENTCOM) АҚШ армиясы Иранның Ормуз бұғазы арқылы өткен үш коммерциялық кемеге жасаған шабуылдарына жауап ретінде бұл елге қарсы ауқымды соққы бастағанын жариялады.
CENTCOM: «АҚШ Орталық қолбасшылығының күштері халықаралық су жолында экипажы жазықсыз бейбіт тұрғындардан тұратын коммерциялық кемелерді нысанаға алып, шабуылдағаны үшін Иранға ауыр зардап шектіру мақсатында бірқатар қуатты соққы жасады», — деп хабарлады.
Мәлімдемеде бұған қоса: «АҚШ-тың соққылары Иранның Ормуз бұғазынан өткен үш коммерциялық кемеге жасаған шабуылдарына қайтарылған жауап сипатында. Иранның бұл агрессиясы негізсіз, қауіпті және бітімгершілік келісімін ашық түрде бұзу болып табылады», — деп толықтырылған.
CENTCOM жүргізілген операциялардың нақты нысаналары мен ауқымы туралы егжей-тегжейлі ақпарат берген жоқ.
