Израиль 2025 жылғы 10 қазан жұма күні халықаралық уақытпен сағат 09:00-де атысты тоқтату келісімі күшіне енгенін хабарлады.
Израиль армиясы Анадолы агенттігіне жіберген жазбаша мәлімдемесінде «Атысты тоқтату келісімі Израиль уақытымен сағат 12:00-де күшіне енді. Осы уақыттан бастап армия күштері атысты тоқтату келісіміне сәйкес жаңа операциялық орналастыру желілеріне және тұтқындарды қайтару шараларына сәйкес позицияларын алды», – деп хабарлады.
Мәлімдемеде армия күштері оңтүстік командалық аймақта орналастырылғаны және «кез келген шұғыл қауіп-қатерді жою үшін жұмысын жалғастыратыны» айтылды. Мәлімдемеде басқа мәліметке орын берілмеді.
Оқиға орнынан хабарлаған Анадолы агенттігі тілшісінің айтуынша, атысты тоқтату басталған кезде мыңдаған палестиналық Газа секторының оңтүстігінен Газа қаласына Әл-Рашид көшесі арқылы қайта оралуда. Израиль армиясы палестиналықтарға Әл-Рашид және Салах ад-Дин жолдары арқылы қозғалысқа рұқсат берілгенін мәлімдеді.
Израиль армиясы жұма күні Газадан әскерлерін біртіндеп шығару процесінің алғашқы кезеңін бастады және АҚШ президенті Дональд Трамптың Газадағы соғысты тоқтату жоспарына сәйкес, 24 сағат ішінде белгіленген орындарға толықтай шегінуді аяқтайды деп хабарлады.
Израильдің армия радиосының мәліметінше, Трамп жоспарына сәйкес Газадан біртіндеп әскер шығару жұма күні түстен кейін аяқталады.
