Бурханеттин Дуран: «НАТО заманауи құрылымдық соғыс қаупіне қарсы қайта қалыптасуы тиіс»
Бурханеттин Дуран НАТО-ның мықты тежеу тетіктері мен тиімді дағдарыс басқаруына басымдық беруі керектігін айтып, Түркияның бірнеше өңірде бейбітшілікті қолдауды жалғастырып отырғанын жеткізді.
Президент аппараты жанындағы Коммуникация басқармасының төрағасы НАТО-ның қазіргі құрылымдық соғыс қаупіне қарсы мықты әрі кешенді тәсіл қабылдап, дағдарыстарды тиімді басқаруға ерекше назар аударуы қажет екенін мәлімдеді.
Мүше мемлекеттер арасындағы қорғаныс стратегияларындағы айырмашылықтарға тоқталған Бурханеттин Дуран бұл алуандықтың көбіне одақ ішінде келіспеушіліктерге себеп болатынын атап өтті.
«НАТО заманауи құрылымдық соғысқа қарсы қайта қалыптасуы керек. Ұйым төзімділікке, тиімді тежеуге және мықты дағдарыс басқаруына назар аударуы тиіс», – деді Дуран.
Анкарада өткен «НАТО-ның Анкара кезеңі: Мықты одақ үшін стратегиялық бағдар» атты конференцияда сөз сөйлеген Дуран Түркияның одаққа елеулі үлес қоса алатын әлеуеті бар екенін айтты.
«Түркия бұрынғыдай әрі алдағы уақытта да НАТО-ға елеулі үлес қосуға қабілетті», – деп қосты.
Түркияның НАТО-дағы рөлі
Одақтың жылдар бойы қалай өзгергеніне тоқталған Бурханеттин Дуран НАТО-ның бастапқыда Кеңес Одағы қаупіне қарсы құрылғанын және Қырғи-қабақ соғыс аяқталғаннан кейін өз миссиясын табысты орындағанын атап өтті.
Ол бүгінгі таңда әлем көпқырлы әрі күрделі халықаралық тәртіптің бұзылуымен бетпе-бет келгенін ескертті.
«НАТО тағы да өз тәсілін қайта қарауға мәжбүр болып отыр», – деді Бурханеттин Дуран.
Сондай-ақ ол Украинадағы қақтығысқа, АҚШ пен Израильдің Иранға қарсы соғысына және Таяу Шығыстағы шиеленістерге тоқталды. Түркияның стратегиялық рөлі мен қауіпсіздік көзқарасын ерекше атап өтті.
«Түркия бұл үдерісте тек өз шекарасын қорғап қана қойған жоқ, сонымен қатар өңірде және әлемде бейбітшілік пен қауіпсіздікті нығайтуға да үлес қосты», – деді ол.
Режеп Тайып Ердоған басшылығымен Анкараның дипломатиялық бастамаларын мысалға келтірген Дуран Түркияның Ресей мен Украина арасындағы дағдарыста конструктивті рөл атқарғанын және Қарабақ мәселесіне әділ шешім табуға үлес қосқанын айтты.
Түркия өз өңірінен тыс Африкада қақтығысушы тараптарға араағайын болып, құрлықтағы тұрақтылықты нығайту арқылы бейбітшілікті белсенді түрде қолдап келеді.