Трамп Иранның «сөйлескісі келетінін» айтты

АҚШ президенті Дональд Трамп Таяу Шығысқа авиатасығыш соққы беру тобын қамтитын қосымша әскери күш орналастырғанын, ал Иранның Вашингтонмен келісім жасасуға тырысып жатқанын айтты.

Дүйсенбі күні «Axios» агенттігіне берген сұхбатында Трамп Иранмен арадағы жағдайдың «өзгеріп жатқанын» атап өтіп, Иран маңына «үлкен флоттың» жеткенін білдірді.

Трамп: «Олар келісім жасағысы келеді. Мен мұны білемін. Бірнеше рет қоңырау шалды. Олар сөйлескісі келеді», — деді.

АҚШ «USS Abraham Lincoln» авиатасығыш соққы беру тобын Таяу Шығысқа орналастыру арқылы аймақтағы позициясын нығайтты. АҚШ Орталық қолбасшылығы «Nimitz» класындағы авиатасығыш кеменің аймаққа «аймақтық қауіпсіздік пен тұрақтылықты қолдау» мақсатында барғанын мәлімдеді.

Иран риалдың күрт құнсыздануы мен экономикалық жағдайдың нашарлауына байланысты 28 желтоқсанда Тегеранның Үлкен базарында басталған наразылықтармен шайқалып жатыр. Кейіннен шерулер басқа да бірнеше қалаға тарады.

Трамп егер наразылық білдірушілер өлтірілетін болса, Иранға «қатты соққы берілетінін» бірнеше рет ескерткен болатын, бірақ кейінірек сөзін жұмсартып, Тегеранның жүздеген өлім жазасын тоқтатқанын алға тартты.

Иран билігі АҚШ пен Израильді «қарулы бүлікшілерді» қолдап отыр деп айыптап, АҚШ тарапынан кез келген шабуыл жасалған жағдайда, Иранның «жылдам әрі ауқымды» жауап беретінін ескертті.