АҚШ пен Израиль Тегеранға шабуылдады
Иранның жедел жәрдем қызметтері Тегеранда қаза тапқандардың арасында алты бала бар екенін хабарлады, ал Иранның ауқымды зымыран шабуылынан Израильдің Хайфа қаласына елеулі зақым келді.
Жергілікті БАҚ-тың мәліметінше, дүйсенбі күні таңертең Иранда АҚШ пен Израильдің бірлескен шабуылдарынан кемінде 17 адам қаза тапты. «Mehr» ақпарат агенттігінің хабарлауынша, ел астанасының шығыс бөлігіне жасалған шабуыл салдарынан үш ғимарат қирап, шамамен 50 үй зақымданды.
Тегеранның Бахарестан ауданының әкімі өлім-жітім Калъе Мир елді мекеніндегі екі тұрғын үйдің АҚШ пен Израиль күштері тарапынан бомбалауға ұшырауынан болғанын айтып, қирандылар астында іздестіру-құтқару жұмыстары жалғасып жатқанын мәлімдеді.
Тегеранда түн ортасында да жарылыс дауыстары естілді.
Иранның мемлекеттік бұқаралық ақпарат құралдары мен төтенше жағдай қызметтері дүйсенбі күні таңертең АҚШ пен Израиль күштері Тегеранның тұрғын аудандарын және қаланың басқа да нысандарын соққыға алғаннан кейін қаза тапқандар арасында кемінде алты баланың бар екенін хабарлады.
Қалада әскери ұшақтар байқалып, оңтүстік және батыс аудандарда жарылыстар болды.
Тегеранға жасалған шабуылдар барысында Шариф технология университетінің де нысанаға алынғаны хабарланды.
Хайфа қаласына бағытталған зымыран шабуылдары
Израильдің Хайфа қаласы Иранның ауқымды зымыран шабуылына ұшырады. Жарылғыш оқтұмсықтары бар зымырандар қаланың әртүрлі аудандарына құлап, бірнеше жерде өрттің шығуына себеп болды.
Израиль полициясы шабуылдардан кейін Кармель аймағындағы бірнеше нүктеге сапер мамандардың жіберілгенін хабарлады.
Зымыран шабуылы бірнеше ғимарат пен көлікке айтарлықтай зиян келтірді.
«Channel 12» арнасының мәліметінше, құтқарушылар Хайфа қаласындағы бір үйінді астынан екі адамның мәйітін алып шыққан.