Антониу Кошта: «АҚШ пен Израильдің Иранның азаматтық инфрақұрылымына жасаған шабуылдары заңсыз»
Еуропалық кеңестің төрағасы Антониу Кошта Таяу Шығыста бес аптаға созылған соғыстан кейін дағдарыстың негізгі себептерін тек дипломатиялық жолмен шешуге болатынын айтты.
Антониу Кошта соғыс барысында азаматтық инфрақұрылым нысандарына жасалған шабуылдардың заңсыз екенін атап өтті.
Кошта бұл ескертуді АҚШ президенті Дональд Трамп Иран Ормуз бұғазын қайта ашпаса, елдегі азаматтық инфрақұрылымды жоюмен қорқытқаннан кейін жасады.
Антониу Кошта «X» желісіндегі жазбасында «Азаматтық инфрақұрылымды, әсіресе энергетикалық нысандарды нысанаға алу – заңсыз әрі қабылдауға болмайтын әрекет. Бұл Ресейдің Украинадағы соғысына да, жалпы барлық соғысқа қатысты. Иран халқы – ең алдымен Иран режимінің құрбаны. Егер әскери операциялар кеңейсе, Иранның өзі де басты құрбанға айналады», – деді.
Сондай-ақ ол: «Еуропалық Одақ Иранды аймақтағы елдерге қарсы шабуылдарын дереу тоқтатуға және Ормуз бұғазында толық теңіз қатынасы еркіндігін қайта қалпына келтіруге шақырады. Таяу Шығыстағы бес апталық соғыстан кейін бұл мәселенің түпкі себептері тек дипломатиямен шешілетіні анық», – деп қосты.