Иранның ұшқышсыз ұшағы Әзербайжанға келіп құлады
Әзербайжан Нахчыван әуежайы маңында бейбіт тұрғындардың жаралануына және аймақтық шиеленістің ушығуына себеп болған Иранның ұшқышсыз ұшақтарының шабуылын айыптады.
Ираннан ұшырылған ұшқышсыз ұшақтар бейсенбі күні Әзербайжанның Нахчыван аймағына соққы беріп, Нахчыван халықаралық әуежайы маңында өрттің шығуына себеп болды. Бейнежазбаларда Иран шекарасынан шамамен 10 шақырым жерде орналасқан әуежай маңынан көтерілген қою қара түтін көрінеді.
Әзербайжан Сыртқы істер министрлігі бейсенбі күні түс кезінде Иран аумағынан жасалған ҰҰА шабуылдары Нахчыван Автономиялық Республикасы әуежайының терминалын және Шекербад ауылындағы мектеп ғимаратының маңын нысанаға алғанын растады.
Министрлік өз мәлімдемесінде «Иран Ислам Республикасы аумағынан жүзеге асырылған, әуежай ғимаратына зақым келтіріп, екі бейбіт тұрғынның жаралануына әкеп соққан бұл ҰҰА шабуылдарын қатаң айыптаймыз», — делінген. Баку бұл шабуылдарды аймақтық шиеленісті ушықтыратын халықаралық құқықты бұзу ретінде сипаттап, Ираннан дереу түсініктеме беруді және алдын алу шараларын қабылдауды талап етті. Мәлімдемеде «Иран Ислам Республикасынан аталған мәселені қысқа мерзімде нақтылауды, түсініктеме беруді және болашақта мұндай оқиғалардың қайталанбауы үшін қажетті әрі шұғыл шаралар қабылдауды талап етеміз», — деп көрсетілген.
Баку жауап қайтару құқығына ие
Әзербайжан үкіметі мұндай шабуылдар қайталанған жағдайда, тиісті шаралармен жауап қайтару құқығын бар екенін ескертті.
Иранның Әзербайжандағы елшісі Мүжтеба Демирчилу Әзербайжан Сыртқы істер министрлігіне шақырылды. Министрлік «Иран тарапына қатаң наразылық білдіріліп, тиісті наразылық нотасы табыс етіледі», — деп мәлімдеді.