Жапония премьер-министрі Санаэ Такаити парламентті таратып, мерзімінен бұрын сайлау өткізу жоспарын дүйсенбі күні ресми түрде жарияламақ.
“Yomiuri” газеті мен өзге де БАҚ-тың хабарлауынша сайлау 8 ақпанда өтуі мүмкін деп күтілуде.
LDP ондаған жыл бойы Жапонияны басқарып келеді, алайда партия ішінде басшылар жиі ауысқан.
Такаити қазан айында премьер-министр қызметіне кірісті, ал оның кабинеті партиясының танымалдығы біртіндеп төмендеп бара жатқанына қарамастан қоғамдық пікір сауалнамаларында жоғары бағалануда.
Қытаймен шиеленіс
Сарапшылардың пікірінше, мерзімінен бұрын сайлау Такаитиге ел ішінде мықты қолдауға ие екенін көрсетіп, Қытаймен арадағы шиеленісті еңсеруге көмектесуі мүмкін.
Токио мен Пекин арасындағы қатынастар Такаитидің қараша айында Қытай Тайваньға шабуыл жасаса, Жапонияның әскери тұрғыда араласуы мүмкін екенін білдіргеннен кейін нашарлады. Тайвань — Қытай өзіне тиесілі деп санайтын, өзін-өзі басқаратын арал.
Алайда Ұлттық саясатты зерттеу жоғары институтының деканы Микитака Масуяма егер Такаити жеңіске жетсе, Қытайдың оған қысымды одан әрі күшейтуі мүмкін екенін ескертті.
Жуырда Қытай Жапонияға әскери мақсатта да қолдануға болатын «қос мақсатты» тауарлардың экспортын кең көлемде шектейтінін мәлімдеді. Сондай-ақ электромобиль мен зымыран өндірісінде аса маңызды саналатын сирек жер металдарының экспорты ішінара тоқтатылғаны хабарланды.
“Asahi” газетінің сауалнамасына сәйкес, респонденттердің 60 пайызы Жапония–Қытай қатынастарының нашарлауы экономикалық салдарға әкеледі деп алаңдайтынын айтқан болатын.
