Пәкістанның Қорғаныс өндірісі министрі шамамен бір жылға созылған келіссөздерден кейін Түркия, Пәкістан және Сауд Арабиясы қорғаныс саласындағы келісімнің жобасын дайындағанын мәлімдеді. Бұл аймақтық қауіпсіздік саласындағы ынтымақтастықты тереңдетуге бағытталған ықтимал қадам ретінде бағалануда.
Түркияның Сыртқы істер министрі Хакан Фидан мұндай келіссөздердің өткенін растады, алайда бүгінгі күнге дейін ешқандай келісімге қол қойылмағанын атап өтті.
Пәкістанның Қорғаныс министрі Раза Хаят Харраж бейсенбі күні “Reuters” ақпарат агенттігіне берген сұхбатында ұсынылып отырған үшжақты келісімнің өткен жылы Пәкістан мен Сауд Арабиясы арасында жарияланған екіжақты қорғаныс келісімінен бөлек екенін айтты.
Харраж келісімді түпкілікті бекіту үшін үш ел арасында соңғы әрі толық өзара келісімге қол жеткізу қажет екенін жеткізді.
Харраждың айтуынша, бұл келіссөздер кең ауқымды тұрақсыздық жағдайында үш аймақтық державаның қорғаныс саласындағы ынтымақтастықты нығайтуға деген ортақ мүддесін көрсетеді.
Жақында Сауд Арабиясы мен Пәкістан Стратегиялық өзара қорғаныс туралы келісімге қол қойып, «екі елдің біріне жасалған кез келген шабуыл екеуіне бірдей жасалған шабуыл ретінде қаралатынын» міндеттеме еткен болатын.
Фидан: “Келіссөздер жалғасуда”
Бейсенбі күні Стамбулда сөйлеген сөзінде Түркияның Сыртқы істер министрі Хакан Фидан келіссөздердің жүргізіліп жатқанын растады, бірақ әзірге ешқандай келісімге қол қойылмағанын тағы да атап өтті.
Мүмкін болатын үшжақты келісім туралы БАҚ-та тараған хабарларға қатысты сұрақтарға жауап берген Фидан бұл үдерісті тар ауқымды одақ құрудан гөрі, кеңірек аймақтық ынтымақтастық тұрғысынан қарастыру қажет екенін айтты.
Фидан аймақ елдері арасындағы сенімнің маңызын атап өтіп, қақтығыстарды, терроризмді және сыртқы араласуды қоздыратын алауыздықтарды еңсеру қажеттігін айтты.
Фидан сөзінде Пәкістан немесе Сауд Арабиясын тікелей атамағанымен, Түркияның ұзақ мерзімді аймақтық қауіпсіздікті қамтамасыз ететін және сенімді арттыратын бастамаларға ашық екенін айтты.
Исламабад пен Анкара тарапынан жасалған мәлімдемелер келіссөздердің әзірге кеңесу деңгейінде екенін көрсеткенімен, үш ел арасында тұрақты дипломатиялық байланыстар жалғасып жатқанын білдірді.
