Түркия кейбір үнді медиа ұйымдарының Анкара мен Үндістандағы террор шабуылдарын өзара байланыстырып көрсеткен айыптауларын жоққа шығарды.
Түркияның Дезинформацияға қарсы күрес орталығы сәрсенбі күні түрік әлеуметтік желісі «Nsosyal» арқылы жасаған мәлімдемесінде, кейбір үнді медиасында әдейі таратылған Түркияның Үндістандағы террорлық әрекеттерге қатысы бар, сондай-ақ террористік топтарға логистикалық, дипломатиялық және қаржылық қолдау көрсетеді деген айыптаулар екі ел арасындағы қатынастарды бұзуды мақсат еткен қасақана дезинформациялық науқанның бір бөлігі екенін атап өтті.
Дезинформацияға қарсы күрес орталығы лаңкестік әрекет қай жерде, кім тарабынан жасалса да, оның барлық түрлерін үзілді-кесілді қабылдамайтынын қайталап, Түркияның халықаралық ынтымақтастық арқылы жаһандық терроризмге қарсы күресте жетекші рөл атқарып келе жатқанын мәлімдеді.
Осыған байланысты Анкараның БҰҰ-ның Жаһандық терроризмге қарсы күрес стратегиясын белсенді түрде қолдап отырғанын және НАТО-ның терроризмге қарсы саясатын қалыптастыруда маңызды рөл атқарып келе жатқанын жеткізді.
Дезинформацияға қарсы күрес орталығы сондай-ақ Түркияның Үндістанда немесе кез келген басқа елде радикалдандыру әрекеттерін жүргізеді деген айыптауларды толығымен дезинформациялық мақсаттағы, негізсіз мәлімдемелер екенін қоса айтты.
Орталық мұндай негізсіз және манипуляциялық жаңалықтардың Түркияны нысанаға алып, елдің жаһандық қауіпсіздік, тұрақтылық және бейбітшілік үшін күш-жігерін бұзуға бағытталғанын мәлімдеді және қоғамды бұл айыптауларға сенбеуге шақырды.
