«NBC News» жүргізген жаңа сауалнамаға сәйкес, АҚШ-та тіркелген сайлаушылардың көпшілігі Дональд Трамптың Иранмен болған шиеленісті басқару тәсілін құптамайды және «Америка әскери шабуыл бастамауы керек еді» деген пікірде.
Сауалнама нәтижесі бойынша, сайлаушылардың 54 пайызы Дональд Трамптың Иранға қатысты саясатын қолдамайтынын, ал 41 пайызы қолдайтынын білдірген. 5 пайызы болса жауап бермеген.
Әскери операция мәселесіне қатысты сұрақта қатысушылардың 52 пайызы АҚШ Иранға шабуыл жасамауы керек деп есептейді, ал 41 пайызы бұл шешімді қолдаған. 7 пайызы бұл мәселе бойынша нақты пікір білдірмеген.
Пікірлер негізінен партиялық ұстанымдарға сәйкес келеді, алайда сауалнама әскери операцияға наразы республикашыл топтың бар екенін көрсетті.
Сонымен қатар ұрпақтар арасындағы айырмашылықтар да анық байқалды. Жас және егде жастағы сайлаушылар соғыстың алғашқы кезеңдеріне әртүрлі реакция білдірген.
«NBC News» жүргізген бұрынғы сауалнамалар АҚШ-тың әскери операцияларына бастапқы кезеңде қоғамдық қолдау әдетте жоғары болатынын көрсетеді.
Мәселен 2002 жылдың басынан 2003 жылдың басына дейінгі сауалнамалар америкалықтардың көпшілігі Саддам Хусейнді биліктен кетіру мақсатында Иракта жүргізілген әскери операцияны қолдағанын көрсетті.
Сондай-ақ 2001 жылдың қазанында америкалықтардың 87 пайызы 11 қыркүйек терактілерінен кейін Ауғанстандағы алғашқы АҚШ шабуылдары кезінде Джордж Буштың терроризмге қарсы соғыс жүргізу тәсілін мақұлдаған. Алайда уақыт өте келе бұл соғыстарға қолдау азайып, көптеген америкалық олардың жұмсалған шығынға тұрмайтыны туралы қорытындыға келген.
Республикашылдар Иранға қарсы соғысты қолдайды
Иранға қарсы шабуылдарға ең күшті қолдау республикашылдар арасында байқалды. Республикашыл сайлаушылардың шамамен 77 пайызы АҚШ-тың шабуылын қолдаса, 15 пайызы қарсы шыққан. Сауалнама сондай-ақ партия ішіндегі көзқарастың әртүрлі екенін көрсетті.
