«FIFA» стадиондардағы тәртіп ережелеріне соңғы сәтте өзгеріс енгізіп, 2026 жылғы әлем чемпионатына келетін жанкүйерлерге қайта пайдаланылатын су бөтелкелерін стадиондарға алып кіруге тыйым салды.
«FIFA» бейсенбі күні жасаған мәлімдемесінде бұған дейін рұқсат етілген бос, мөлдір пластик су бөтелкелері осы аптада күшіне енген жаңа ережелерге сәйкес енді тыйым салынған заттар қатарына енгізілгенін хабарлады.
Су бөтелкелерімен қатар стақандарға, банкаларға және өзге де ыдыстарға тыйым салынды. «FIFA» бұл шешім ойыншылардың, ресми тұлғалардың және көрермендердің алаңға лақтырылған заттардан жарақат алу қаупін азайту мақсатында қабылданғанын мәлімдеді.
Федерация: «FIFA» барлық ойыншының, төрешінің, жанкүйердің, ерікті мен қызметкердің денсаулығы мен қауіпсіздігін қорғайды», – деді. Сондай-ақ мұндай шектеулердің көптеген спорт нысанында қолданылып жүргенін жеткізді.
Турнир қарсаңында ауа райына қатысты алаңдаушылық күшейді
Бұл шешім турнир өтетін кейбір қалаларда ауа температурасы 26–28 градусқа дейін көтеріледі деген болжам аясында жанкүйерлер арасында ауызсуға қолжетімділік мәселесіне қатысты алаңдаушылық туғызды.
«FIFA» стадион маңында су тарату бекеттерін, ашық аспан астындағы салқындату жүйелерін, арнайы салқындату шатырларын және желдеткіштерді орнататынын мәлімдеді.
Сонымен қатар федерация стадиондарда сатылатын ауызсудың бағасы басқа іс-шаралар кезіндегі бағамен бірдей болатынын хабарлады.
АҚШ, Канада және Мексика бірлесіп өткізетін 2026 жылғы әлем чемпионаты 11 маусым мен 19 шілде аралығында өтеді. Турнирге 48 құрама қатысып, жалпы саны 104 матч болады. Бұл – әлем чемпионаттары тарихындағы ең жоғары көрсеткіш.
