Түркия мен Пәкістан Сыртқы істер министрлері Ирандағы соғысты талқылады

Түркия Сыртқы істер министрлігіндегі дереккөздер Сыртқы істер министрі Хакан Фидан мен пәкістандық әріптесі Мұхаммед Исхак Дардың Ирандағы соғыс туралы сөйлескенін мәлімдеді.

Фидан мен Дар сейсенбі күнгі телефон әңгімесінде АҚШ пен Израильдің Иранға жасаған шабуылдарынан басталған соғысты тоқтатуға бағытталған дипломатиялық күш-жігер туралы пікір алмасты. Пәкістан бұған дейін Таяу Шығыстағы өршіп тұрған соғысты тоқтату үшін дипломатиялық талпыныстарға «уақыт пен мүмкіндік» берілуін талап еткен болатын.

Пәкістан премьер-министрі Шахбаз Шариф: «Таяу Шығыста жалғасып жатқан соғысты бейбіт жолмен шешуге бағытталған дипломатиялық күш-жігер тұрақты түрде алға жылжып келеді», — деп мәлімдеді.

Ақ Үй Пәкістанның соңғы ұсынысы АҚШ президенті Дональд Трампқа «жеткізілгенін» атап өтті. Баспасөз хатшысы Каролин Ливитт: «Президент ұсыныспен танысты, жақын арада жауап береді», — деді.

Трамп әкімшілігі белгілеген соңғы мерзім жақындап қалды

Бұл телефон әңгімесі Трамптың Иран үшін белгілеген соңғы мерзіміне бірнеше сағат қалғанда өткізілді.

Израиль мен АҚШ-тың 28 ақпанда Иранға қарсы бастаған және бірнеше аптаға созылған шабуылдарынан бері бүкіл аймақ жоғары дайындық режімінде тұр. Тегеран болса Израильге, Иорданияға, Иракқа және АҚШ-тың әскери нысандары орналасқан Шығанақтың басқа елдеріне ұшқышсыз ұшу аппараттары және зымырандармен соққы беру арқылы жауап қайтарды. Бұл шабуылдар адам шығыны мен инфрақұрылымдық зақымдарға әкеп соғып, жаһандық нарықтар мен авиация саласының жұмысын іркілтті.