Түркия Ауыл және орман шаруашылығы министрі Ибраһим Юмаклы Хорватияда жоғалып кеткен Орман шаруашылығы бас басқармасына тиесілі өрт сөндіру ұшағының қалдығы табылғанын, ал ұшқыштың шейіт болғанын мәлімдеді.
Министр бейсенбі күні түрік әлеуметтік желі платформасы «Nsosyal»-да: «Радиобайланысы үзілген Орман шаруашылығы бас басқармасына тиесілі өрт сөндіру ұшағының қирандылары Хорватияның Сень қаласы маңынан табылды. Осы қайғылы апатта шейіт болған ұшқышымызға Алладан рақмет, отбасы мен жақындарына сабыр тілеймін»,- деп жазды.
Бұған дейін Ауыл және орман шаруашылығы министрлігі Хорватияда Түркия Орман шаруашылығы бас басқармасына тиесілі өрт сөндіру ұшағымен радиобайланыс үзілгенін хабарлаған болатын.
Министрліктің мәлімдемесінде төмендегідей ақпарат берілді: «Орман шаруашылығы бас басқармасына тиесілі екі «AT802» өрт сөндіру ұшағы 12 қараша, сәрсенбі күні сағат 10:24-те Чанаккаледен Хорватияның Загреб қаласына техникалық қызмет көрсету үшін ұшты. Ауа райының нашарлауына байланысты екі ұшақ та түнді Хорватиядағы Риекa әуежайында өткізді. 2025 жылдың 13 қарашасы, бейсенбі күні сағат 17:38-де екі ұшақ Загреб әуежайына қарай қайта ұшты, алайда қолайсыз ауа райы салдарынан кері қайтуға мәжбүр болды. Кері қайту кезінде ұшақтардың бірі Риекa әуежайына қауіпсіз қонды, ал екіншісімен сағат 18:25-те радиобайланыс үзілді».
