Сәрсенбі күні Сиднейде өткен келіссөздерден кейін Австралия мен Индонезия әскери ынтымақтастықты нығайтуға бағытталған жаңа қауіпсіздік келісімін жасауға келісті.
Канберра ұзақ уақыт бойы одақтасы болып келген Вашингтонмен қатынасын нығайтып, аймақта Қытайдың күшейіп келе жатқан ықпалына қарсы тұру үшін әскери қуатын арттыруда.
Австралия премьер-министрі Энтони Албанезе Сиднейдегі Австралия Корольдік теңіз флоты базасында Индонезия президенті Прабово Субиантомен кездесуде: «Біз ортақ қауіпсіздігімізге қатысты екіжақты келісім бойынша келіссөздерді жаңа ғана аяқтадық», - деді.
Ол бұл келісімнің екі елдің «бейбітшілік пен тұрақтылықты қамтамасыз етудің ең жақсы жолы — бірлесіп әрекет ету екенін мойындайтынын» атап өтті.
Албанезе жаңа келісімге қол қою үшін келесі жылы Индонезияға баруға ниетті екенін жеткізді.
Премьер-министрдің айтуынша, бұл жаңа келісім 2024 жылы жасалған екіжақты қорғаныс пактіне негізделген. Ол құжатта Азия-Тынық мұхитының даулы аймақтарында тығыз ынтымақтастық орнату және екі ел әскерлерінің бір-бірінің аумағында бірлескен операциялар жүргізу мүмкіндігі қарастырылған.
2024 жылғы келісімге қол қойылғаннан бірнеше ай өткен соң мыңдаған индонезиялық және австралиялық сарбаз Шығыс Явада бірлескен әскери оқу-жаттығу өткізген еді.
Албанезенің айтуынша, жаңа келісім аясында Австралия мен Индонезия қауіпсіздік мәселелерін тұрақты түрде жоғары деңгейде талқылауға, өзара тиімді қауіпсіздік шараларын жүзеге асыруға және егер бір немесе екі елдің қауіпсіздігіне қатер төнсе, жеке немесе бірлескен жауап шараларын қарастыруға уағдаласқан.
Прабово өз кезегінде бұл келісім екі елді «қорғаныс пен қауіпсіздік саласында тығыз ынтымақтастыққа» итермелейді деп мәлімдеді.
«Көршілерімізді таңдай алмаймыз... әсіресе біздің жағдайымызда. Жақсы көршілер қиын сәттерде бір-біріне көмек қолын созады», - деді ол.
Қытай мен АҚШ арасындағы бәсеке өршіп тұрған кезде Австралия Индонезиямен қатынасты нығайтуға мүдделі.
