Иран “Mossad” тыңшысы деген айыппен бір адамды өлім жазасына кесті
Иран Израильдің пайдасына жасалатын тыңшылық әрекеттердің жолын кесу мақсатында “Mossad”-пен сыбайлас деп күдіктелген адамдарды тұтқындап, өлім жазасына кесуде.
Иран сот жүйесінің ақпараттық органы “Mizan” агенттігінің хабарлауынша, Иран Израильдің пайдасына тыңшылық жасағаны үшін кінәлі деп танылған адамды өлім жазасына кесті. Сотталушының аты-жөні Әли Ардестани екені жарияланды.
Израильмен ондаған жыл бойы құпия соғыс жүргізіп келе жатқан Иран Израиль барлау қызметімен байланысы бар және Иран аумағында операциялар жүргізуге көмектесті деп айыпталған бірнеше адамды бұған дейін де өлім жазасына кескен болатын.
“Mizan” агенттігі «Әли Ардестанидің Иранның құпия мәліметтерін “Mossad” барлау қызметінің пайдасына беру арқылы тыңшылық жасағаны үшін алған өлім жазасы Жоғарғы соттың мақұлдауынан және заңды процедуралардан кейін орындалды», — деп мәлімдеді.
Ұзақ уақыт бойы өзара жауласқан екі ел арасындағы шиеленістің күшеюіне байланысты Израиль үшін тыңшылық жасады деп айыпталған ирандықтарды өлім жазасына кесу жиілігі артқаны байқалады.
Көп жылдарға созылған жасырын шабуылдар, кибер-операциялар және жанама соғыстардан кейін екі ел арасындағы өзара операциялар өткен маусым айында АҚШ-тың қолдауымен Израильдің Иранның ядролық нысандарына шабуыл жасауымен тікелей қақтығысқа ұласты.
Содан бері Иран билігі тыңшылық әрекеттердің алдын алу және аймақтық шиеленіс кезінде ұлттық қауіпсіздікті нығайту мақсатында “Mossad”-пен ынтымақтастықта болды деп айыпталған адамдарды тұтқындау мен өлім жазасына кесуді күрт арттырып, ішкі қауіпсіздік шараларын қатайтты.