Биліктің мәліметінше, Пәкістанның Карачи қаласындағы бір сауда орталығында шыққан ірі өрттен, кемінде алты адам қаза тапты. Оның бірі өрт сөндіруші. Көптеген адам жараланды.

Карачи муниципалитетінің өрт сөндіру қызметкері Хамайун Хан журналистерге өрт сенбі күні түнде MA Джинна жолындағы «Gul Plaza» сауда орталығында басталғанын, өрт сөндірушілер оны ауыздықтауға тырысқанын айтты.

Хан сауда орталығында шамамен 1 200 дүкен барын, олардың ішінде киім, тұрмыстық техника, косметика және қыш-құмыра сататын дүкендер де болғанын, бұл өрттің күшеюіне ықпал еткенін атап өтті. Ол «Әзірге оқиға орнынан бір өрт сөндірушіні қоса алғанда алты мәйіт шығарылды. Жағдайды қалыпқа келтіру үшін топ қарқынды жұмыс істеп жатыр», - деді.

Қаза тапқандар санының кемінде алты екендігін жедел жәрдем мен гуманитарлық Эдхи қоры да растады.

Оқиға орнына барған Синд уәлаятының губернаторы Камран Тессори өрт сөндірушілердің өртті бақылауға алып, адамдарды құтқаруға тырысып жатқанын айтты. «Rescue 1122» мен өрт сөндірушілер ғимаратқа жайылған өртті бақылауға алуға әрекет жасап жатыр», - деді ол.

«Rescue 1122» өкілдері әртүрлі бөлім мен мекемелерден 20 өрт сөндіру көлігінің жұмылдырылғанын растады.