Тәжікстанға осы жылдың қаңтар-маусым аралығында келген шетелдік туристердің саны 889 мың 400 адамды құрады.

Тәжікстанның Туризмді дамыту комитетінің төрағасы Жамшед Джурахонзода елорда Душанбеде өткізген баспасөз мәслихатында елге келген туристердің саны туралы мәлімет берді.

Джурахонзода жылдың алғашқы жартысында елге келген шетелдік турист санының өткен жылдың осы кезеңімен салыстырғанда 127 мың 100 адам артқанын, бұл 16,7 пайыздық өсімді көрсететінін білдірді.

Туристік маусымның жаңадан басталғанын және қазан айының соңына дейін жалғасатынын айтқан Джурахонзода осы себепті жылдың екінші жартысында шетелдік меймандар санының одан әрі артатынын күтетіндерін жеткізді.

Жылдың алғашқы жартысында елге келген шетелдік турист санының 889 мың 400-ге жеткенін хабарлаған Джурахонзода олардың 806 мың 900-і Тәуелсіз Мемлекеттер Достығы (ТМД) елдерінен, ал 82 мың 500-і басқа мемлекеттерден келгенін атап өтті.

Осы кезеңде Тәжікстанға ең көп турист жіберген ел 510 мың 400 саяхатшымен Өзбекстан болғанын айтқан Джурахонзода Өзбекстаннан кейінгі орындарды 175 мың 800 адаммен Ресей, 89 мың адаммен Қырғызстан, 23 мың 100 адаммен Қазақстан және 22 мың 700 адаммен Қытай иеленгенін тілге тиек етті.

Джурахонзода жыл соңына дейін Тәжікстанға шетелдік туристерді тартатын туристик компанияларға түрлі жеңілдіктер мен ынталандыру шараларын ұсыну жоспарланып отырғанын да хабарлады.

Аумағының 90 пайыздан астамы таулы аймақтардан тұратын Тәжікстанда туризм кірісінің басым бөлігі тау және табиғат туризмінен түседі. Жаяу серуендеу, тауға шығу (альпинизм) және экотуризм бағыттарымен ерекшеленетін Тәжікстандағы Памир мен Фан таулары ең көп саяхатшы тартатын мекендердің қатарында.

Тәжік ресми өкілдері туризм саласына арналған жеңілдіктер іске асырылып, маусым күтілгендей өткен жағдайда, 2026 жылдың соңына қарай елге 2 миллионнан астам шетелдік турист келеді деп болжайды.

Тәжікстанға өткен жылы келген шетелдік туристер саны алдыңғы жылмен салыстырғанда 27,5 пайызға артып, 1 миллион 783 мың 900-ге жеткен болатын.