Стамбул губернаторлығы Мәрмәр теңізінің Силиври жағалауында екі сауда кемесі соқтығысқанын және қазіргі уақытта 10 экипаж мүшесінің із-түзсіз жоғалып кеткенін хабарлады.

Губернаторлықтың мәлімдемесіне сәйкес, Коджаэлиден Алиагаға бағыт алған Түркия туы бар «Alsu» сауда кемесі мен Искендерун портынан Қаратеңіз Эреглиге бет алған «Tuğberk İmamoğlu» сауда кемесі сәрсенбі күні таңғы сағат шамамен 03:00-де Силивриден оңтүстікке қарай 18 теңіз милі қашықтықта соқтығысқан.

Оқиға орнына Түркияның Жағалау қауіпсіздігі бас басқармасы мен Жағалау күзетінің Мәрмәр теңізі және бұғаздар қолбасшылығына қарасты бірнеше теңіз құралы, сондай-ақ Жағалау күзетінің тікұшағы жіберілді.

Губернаторлық: «Оқиға орнына жеткен топтардың алғашқы тексеруіне сәйкес, «ALSU» кемесінде көзге көрінетін зақым анықталған жоқ. Алайда қазіргі уақытта «TUĞBERK İMAMOĞLU» сауда кемесімен және оның бортындағы 10 адаммен байланыс орнату мүмкін болмай отыр. Аймақта іздеу-құтқару жұмыстары жалғасуда», — деп мәлімдеді.