Арменияның «Armenpress» агенттігінің хабарлауынша, парламент сайлауында жеңіске жеткен Пашинян үкімет отырысында елдің экспорт бағыттарын әртараптандыруға басымдық беретінін айтты.
Ол Ахалкалаки-Карс теміржол желісінің екі бағыты да жұмыс істеп тұрғанын атап өтіп, бұл мәселені Грузия премьер-министрімен талқылағанын жеткізді. Пашинянның сөзінше, Грузия тарапы екі бағыт бойынша да ешқандай кедергі болмайтынына кепілдік берген. Сондай-ақ ол бұл мәселені Режеп Тайып Ердоғанмен де талқылағанын айтып, Түркия президентінің теміржол желілерінің ашық екенін растағанын мәлімдеді.
Премьер-министр Әзербайжанның негізгі аумағын Нахчыванмен байланыстыратын «TRIPP» жобасы аясында жаңа мүмкіндіктер ашылатынын атап өтті. Оның айтуынша, Армения үкіметі нарықты әртараптандыру бағытында жүйелі жұмыс жүргізіп келеді және бұл саясат қазірдің өзінде нәтижесін бере бастаған.
Пашинян сондай-ақ логистикалық орталықтарды дамыту мен экспорт көлемін арттырудың маңыздылығына назар аударды.
