Ақ Үй АҚШ президенті Дональд Трамптың осы демалыс күндері Еуропада өтетін Украинаға қатысты келіссөздерде шын мәнінде бейбіт келісімге қол жеткізу мүмкіндігі болса ғана өкіл жіберетінін хабарлады.
Трамптың баспасөз хатшысы Каролин Левитт бейсенбі күні журналистерге президенттің соғысты тоқтатуға ықпал етпеген сансыз кездесулерден қатты шаршағанын жеткізді.
Киев Ақ Үйдің өткен айда ұсынылған және Мәскеуге тиімді деп бағаланған жоспарына қарсы.
Трамп сәрсенбі күні Франция, Германия және Ұлыбритания басшыларымен телефон арқылы сөйлескеннен кейін, қызу консультациялар жүріп жатқанын және осы апта соңында Еуропада жүзбе-жүз кездесудің қарастырылып жатқанын мәлімдеді.
Левитт: “Президент бұл соғыстың аяқталуы үшін нақты әрекет жасалуын қалайды, ал әкімшілік соңғы бірнеше аптада Ресей, Украина және Еуропа тараптарымен 30 сағаттан астам келіссөз жүргізді. Демалыс күнгі кездесулердің нәтижесін көреміз.” — деді.
