Трамп Венесуэладағы есірткі контрабандасына қарсы әскери операция жариялады
Президент Трамп АҚШ-тың Венесуэланың теңіздегі есірткі контрабандасын тоқтатқанын және құрлықтағы операцияларды бастауға дайындалып жатқанын мәлімдеді.
АҚШ президенті Дональд Трамп бейсенбі күні АҚШ-тың жақын арада құрлықта әрекет ететін венесуэлалық есірткі тасымалдаушыларын нысанаға алуға кірісетінін айтты.
Трамп Америка әскерлерімен өткізген онлайн кездесуде: «Бәлкім байқаған шығарсыздар, адамдар енді теңіз арқылы жеткізгісі келмейді, ал біз оларды құрлықта да тоқтатуды бастаймыз. Құрлық анағұрлым оңай, әрі жақында басталады»,- деді.
Венесуэла Ақпарат министрлігі бұл мәселе бойынша дереу жауап бермеді.
Трамп әкімшілігі америкалықтардың өліміне әкеп соққан заңсыз есірткі тасымалына Николас Мадуроның қатысы бар деген айыптауларға байланысты түрлі нұсқаларды қарастырып жатыр. Ал Мадуро заңсыз есірткі саудасына қатысы бар екенін толықтай жоққа шығаруда.
Өңірдегі АҚШ армиясы қолдарындағы әскери күштің әлдеқайда жоғары болғанына қарамастан, осы кезге дейін тек қана есірткіге қарсы операцияларға назар аударып келді.
АҚШ күштері қыркүйек айынан бері Кариб теңізі мен Тынық мұхитында күдікке ілінген есірткі қайықтарына кемінде 21 шабуыл жасап, 83 адамды өлтірген.
Венесуэламен қарым-қатынас шиеленіскеннен кейін АҚШ армиясының Карибке әскер орналастыруы ықтимал операция жөніндегі хабарлардың соңғы апталарда жылдам артуына жол ашты.
«Reuters» төрт АҚШ шенеунігіне сілтеме жасап, сенбі күні АҚШ-тың Венесуэлаға қатысты операциялардың жаңа кезеңін бастауға дайын екенін хабарлады.