Пәкістан премьер-министрі Шахбаз Шариф дүйсенбі күні АҚШ пен Иран арасындағы соғысты тоқтатуға бағытталған келісімге қол жеткізу үдерісіндегі «ерекше қолдауы» үшін Түркия президенті Режеп Тайып Ердоғанға алғыс айтты.
Шариф Исламабадтағы Ұлттық ассамблеяда сөйлеген сөзінде: «Әсіресе қымбатты бауырым, Түркия президенті Режеп Тайып Ердоғанға ерекше қолдауы мен біздің күш-жігерімізге көрсеткен көмегі үшін алғыс айтамын», – деді.
Сондай-ақ Шариф Қытай төрағасы Си Цзиньпинге, Сауд Арабиясының тақ мұрагері Мұхаммед бен Салманға, Катар Әмірі Шейх Тамим бен Хамад Әл Таниға және басқа да өңірлік серіктестеріне ризашылығын білдірді.
Шариф тарихи маңызы бар келісімге қол жеткізу жолында Пәкістан Қарулы күштерінің бас қолбасшысы Асим Мунирдің, Сыртқы істер министрі Исхак Дардың, Ішкі істер министрі Мохсин Наквидің және Сыртқы істер министрлігі қызметкерлерінің рөлі мен еңбегін жоғары бағалады.
АҚШ президенті Дональд Трамп жексенбі күні Иранмен келісімнің аяқталғанын жариялап, Ормуз бұғазын қайта ашуға және АҚШ-тың теңіз блокадасын тоқтатуға рұқсат бергенін мәлімдеді.
Шариф дүйсенбі күні таңертең өткен қарқынды келіссөздерден кейін АҚШ пен Иранның бейбітшілік келісіміне қол жеткізгенін, ал екі тараптың да Ливанды қоса алғанда барлық бағыттағы әскери операцияларды дереу және тұрақты түрде тоқтататынын хабарлады.
Кейінірек Вашингтон мен Тегеран да бұл мәлімдемені растады.
