Түркияның кілем секторы 2026 жылдың қаңтар-сәуір кезеңінде 871 миллион 732 мың долларлық сыртқы сауда жүзеге асырды.

Анадолы агенттігі тілшісінің Түркия экспорттаушылар мәжілісінің (TİM) мәліметтерінен жинақтаған ақпаратына сәйкес, жылдың алғашқы 4 айында экспортталған 172 миллион 946 мың шаршы метр кілемнен 871 миллион 732 мың доллар табыс табылды.

Өткен жылдың осы кезеңімен салыстырғанда құндық деңгейде 2,1 пайыз, ал көлемдік деңгейде 2 пайыздық төмендеу тіркелді.

Ең көп экспорт 250 миллион 298 мың доллармен АҚШ-қа, 120 миллион 951 мың доллармен Сауд Арабиясына және 68 миллион 400 мың доллармен Ұлыбританияға жасалды.

Жыл соңындағы мақсат — 3,5 миллиард доллар

Кілем секторы кеңесінің төрағасы Искендер Каплан Анадолы агенттігі тілшісіне берген сұхбатында кілем өндірісі Түркияның ең әлеуетті салаларының қатарында екенін білдіріп, «Күн өткен сайын жаңа сән, жаңа дизайн және инновациямен өте қарқынды жұмыс істей отырып, саудамызға екпін қосып келеміз. Жаһандық әлемдегі соғыстардың салдары әрине тиіп жатыр. Әсіресе Таяу Шығыс біздің өте үлкен нарығымыз болғандықтан, Иран соғысына байланысты тасымалдау және логистика тұрғысынан кейбір қиындықтар туындауда. Бұл да уақыт өте келе шешіледі деп ойлаймын», — деді.

Биыл экспорттық межелерді ұлғайтқандарына тоқталған Каплан: «Өткен жылды 2,8 миллиард доллармен түйіндеген едік, биылғы мақсатымыз 3,5 миллиард доллар шамасында болады», — деп сөзін сабақтады.