TRT-мен бірлесіп түсірілген «Palestine 36» («Палестина 36») фильмі 98-ші Академия сыйлығында «Ең үздік халықаралық толықметражды фильм» номинациясының қысқа тізіміне енді. Бұл — палестиналық кино және аймақтық киноөндіріс үшін маңызды жетістік.
TRT бас директоры Захид Собаджы “X” желісінде бұл жаңалықты хабарлап, «Киноның күші арқылы Палестина тарихын ашып көрсететін оқиғаны әлемге жеткізіп отырғанымызды мақтан тұтамыз», - деп жазды.
Палестиналық режиссер Аннемари Жасир түсірген «Палестина 36» фильмі 1936 жылы британдық басқаруға қарсы болған араб көтерілісін қайта бейнелейді. Картина жерінен айырылудың алғашқы белгілері аясында палестиналық жұмысшылар мен көтерілісшілердің өмірін баяндайды.
Британ-ливандық продюсер Сауссан Асфари түсірген бұл тарихи драма кең көлемді зерттеулер мен мұрағат материалдарына негізделген. Фильм бүгін Израиль оккупациясында тұрған аумақтарда бір кездері болған палестиналық университеттерді, мекемелерді және қауымдастықтарға назар аударады.
Фильмнің тұсаукесері Торонто халықаралық кинофестивалінде өтті. Ол жерде көрермен туындыны 20 минут бойы қол соғып қарсы алды. Өткен айда фильм Палестинаның атынан Академия сыйлығының халықаралық толықметражды фильм санатына ресми үміткер ретінде таңдалған болатын.
«Палестина 36» 98-ші Академия сыйлығының халықаралық толықметражды фильм санатына ұсынылған 86 ел мен аймақтан келген жұмыстардың арасынан іріктелген 15 фильмнің бірі атанды.
Қысқа тізім Академияның барлық саласынан қатысқан мүшелердің алдын ала дауыс беруі арқылы анықталды. Тізімге Еуропа, Азия, Таяу Шығыс пен Латын Америкасынан фильмдер енді.
