Венесуэлада бірнеше әуе компаниясына тыйым салынды
Вашингтон Кариб аймағындағы күшейген әскери белсенділіктің есірткіге қарсы операция аясында жүріп жатқанын мәлімдегенімен президент Николас Мадуро бұл әрекеттердің оның үкіметін құлатуға бағытталғанын айтады.
Венесуэланың азаматтық авиация органы бірнеше әуе компаниясының ұшуларын тоқтатқаннан кейін олардың қызметіне тыйым салынғанын хабарлады. Мекеменің хабарлауынша, бұл шешім АҚШ-тың өңірдегі әскери әрекеттерге қатысты жасаған қауіпсіздік ескертулерін ескерген әуе компанияларымен байланысты.
Өткен аптада АҚШ-тың Федералдық Авиация басқармасы ұйымы Венесуэла әуе кеңістігінде ұшатын азаматтық ұшақтарға “қауіпсіздік жағдайының нашарлауына және Венесуэла ішінде немесе маңындағы әскери белсенділіктің артуына” байланысты сақ болуды ескертті.
Вашингтон Кариб аймағына ұшақ тасығыш шабуыл тобы мен басқа да әскери-теңіз кемелерін, сондай-ақ құпия әуе техникасын жіберді. АҚШ бұл әрекетті есірткі тасымалын тоқтатуға бағытталған деп түсіндіргенімен Каракаста билікті құлату мақсат етілген болуы мүмкін деген алаңдаушылық туындады.