Ресей Тергеу комитеті жұма күні Мәскеуде белгісіз шабуылдаушы жоғары лауазымды ресейлік әскери барлау өкілін атып кеткеннен кейін ауқымды тергеу басталғанын және күдіктіні іздеу жұмыстары жүріп жатқанын хабарлады.
Комитет өкілі Светлана Петренко Мәскеудің солтүстік-батысында генерал-лейтенант Владимир Алексеевке оның үйінің алдында бірнеше рет оқ атылғанын, кейін күдіктінің оқиға орнынан қашып кеткенін айтты.
Ресей билігі Алексеевтің жараланып-жараланбағаны және шабуылдың себептері туралы әзірге ешқандай мәлімет бермеді.
Алексеев 2011 жылдан бері Ресей Қарулы күштері Бас штабының Бас барлау басқармасы басшысының бірінші орынбасары қызметін атқарып келеді. Бұл ˗ елдің ең ықпалды, әрі құпия қауіпсіздік құрылымдарының бірі.
Петренко «Telegram» желісінде жасаған мәлімдемесінде қасақана адам өлтіруге оқталу және қару контрабандасы баптары бойынша қылмыстық іс қозғалғанын атап өтті. Оның сөзінше, тергеушілер мен криминалистер оқиға орнында жұмыс жүргізіп, бейнебақылау жазбаларын тексеріп, куәгерлерден жауап алып жатыр. Кінәлілерді анықтау жұмыстары жалғасуда.
Бұл Ресей аумағында жоғары шенді әскери қызметкерге жасалған алғашқы шабуыл емес. Тергеу комитетінің мәліметінше, желтоқсан айында Ресей Қарулы күштері Бас штабының жедел дайындық басқармасының басшысы генерал-лейтенант Фанил Сарваров Мәскеудің оңтүстігінде автокөлігінің астына қойылған жарылғыш заттың жарылуы салдарынан қаза тапқан.
