Стамбулдағы полиция бекетіне жасалған террорлық шабуылдан кейін 10 адам ұсталды
Тағы бес күдікті ұсталып, ауруханада ем алып жатқан жаралы екі шабуылшыны қосқанда, қамауға алынғандардың жалпы саны 10-ға жетті.
Сәрсенбі күні тағы бес адам ұсталып, Стамбулдың Бешикташ ауданындағы полиция бекетіне жасалған террорлық шабуылға қатысты күдіктілер саны 10-ға жетті.
Левент ауданындағы «Yapı Kredi Plaza» ғимаратының алдында және Израиль консулдығына жақын жердегі полиция бекетіне сейсенбі күні жасалған шабуылға қатысты Стамбул Бас прокуратурасы бастаған тергеу жалғасуда. Тергеу аясында полиция Стамбул мен Кожаелі қалаларында анықталған мекенжайларға операция жүргізіп, тағы бес күдіктіні қолға түсірді.
Ауруханада емделіп жатқан екі шабуылшымен бірге ұсталғандар саны 10 адамға жетті. Күдіктілердің сегізі Стамбул полиция департаментінде тергеліп жатыр, ал жаралы екі шабуылшы емделіп болған соң департаментке жеткізіледі.
Құзырлы органдар Бешикташ ауданында полициямен болған атыс кезінде үш шабуылшының көзі жойылғанын, екі полиция қызметкерінің жеңіл жарақат алғанын хабарлады.
“ROKETSAN” компаниясына тиесілі нысанның ашылу салтанатында сөйлеген сөзінде Түркия Республикасының президенті Режеп Тайып Ердоған: «Қаһарман қауіпсіздік күштеріміз тойтарған осы опасыз шабуылды қатаң айыптайтынымызды жеткізгім келеді», — деді. Президент Ердоған: «Терроризмнің кез келген түрімен күресті табандылықпен жалғастырамыз. Бүгінгідей пасық арандатушылықтармен Түркияның қауіпсіздік ахуалына нұқсан келтірілуіне жол бермейміз», — деп атап өтті.