Түркия Израильдің Газадағы қоршау астында қалған аймаққа жасаған соңғы әуе шабуылдарын қатаң айыптап, бұл шабуылдарды Тель-Авивтің "геноцид саясатының" жалғасы деп сипаттады.

Сейсенбі күні жасалған мәлімдемеде Түркия Сыртқы істер министрлігі бұл шиеленістің Нетаньяху үкіметі тарапынан жүзеге асырылған жаңа қанды қырғын кезеңін білдіретінін атап өтті.

"Израиль халықаралық құқық пен жалпыадамзаттық құндылықтарды өрескел бұзып, адамзатқа қарсы әрекет жасауда," – делінген мәлімдемеде.

Министрлік сондай-ақ Израильдің бұл әрекеттері аймақта бейбітшілікті қалпына келтіруге бағытталған жаһандық талпыныстар жалғасып жатқан тұста өңірлік тұрақтылыққа қауіп төндіретінін ерекше атап өтті. "Израильдің жаңа зорлық-зомбылық толқынын туындатуына жол берілмейді." – делінген мәлімдемеде.

Анкара халықаралық қауымдастықты Израильдің агрессиясына қарсы батыл ұстаным танытуға шақырып, тез арада тұрақты бітімге қол жеткізу және Газа секторына гуманитарлық көмектің үздіксіз жеткізілуінің маңыздылығына назар аударды.

"Түркия Палестина халқының әділ ісіне деген мызғымас қолдауын тағы да растайды және аймақтағы бейбітшілік пен тұрақтылықты қамтамасыз етуге бағытталған күш-жігерге өз үлесін қосуды жалғастырады."– деп хабарланды.