АҚШ президенті Трамп президент Ердоғанға алғыс білдірді

АҚШ президенті Дональд Трамп Газа аймағында атысты тоқтатуға көмектескені үшін Түркия президенті Режеп Тайып Ердоғанға алғыс айтты.

Дүйсенбі күні Шарм-эль-Шейхте өткен қол қою рәсімінде Трамп сол жағында Ердоған, ал оң жағында Мысыр мен Катар басшылары отырған кезде: «Түркия деген елден келген бұл мырзаның әлемдегі ең қуатты армиялардың біріне ие екенін айтуым керек. Тіпті бұл күш оның өзі айтқаннан да жоғары», - деді.

«Қиын мінезді адам, бірақ ол менің досым және маған қажет кезде әрдайым жанымнан табылды. Сондықтан Түркия президенті Ердоғанға алғыс айтқым келеді», - деді Трамп. Ол сондай-ақ Ердоғанның «ешқашан жарты жолда қалдырмағанын» атап өтіп, оны «тамаша адам» деп сипаттап, олардың ұзаққа созылған достығы үшін ризашылығын білдірді.

Газада атысты тоқтату келісімі

Газаға қатысты атысты тоқтату келісімінің алғашқы кезеңі жұма күні күшіне енді. Бұл қадам — Трамптың екі жылға созылған Израиль–Газа соғысын тоқтату жөніндегі жоспарының бір бөлігі.

Дүйсенбі күні таңертең ХАМАС пен Израиль арасында тұтқын  алмасты. Израильдің әйгілі Офер әскери түрмесінен және Негев шөліндегі қамау орындарынан жүздеген палестиналық тұтқын босатылды. Сонымен қатар тірі қалған 20 израильдік тұтқын да түрмеден шықты.

Трамп қаза тапқан израильдік тұтқындардың мәйіттерін табу бойынша іздестіру жұмыстары жалғасып жатқанын айтып, былай деді: «Олардың қайда екенін біледі, менің ойымша, бес немесе алтауы анықталды».

«Мәйіттер іздестіріліп жатыр. Олардың орналасқан жерлері белгілі, іздеу топтары далада жұмыс істеуде. Олар Израильмен тығыз ынтымақтастықта және әлі де көптеген дене табылуы мүмкін», - деп қосты ол.