Түркияның алғашқы өздігінен жүзетін суүсті көлігі өндірушісі «ULAQ Global Autonomous Systems» компаниясы Сауд Арабиясының Қоғамдық инвестициялар қорының еншілес ұйымдарының бірі «SAMI Autonomous» компаниясымен өздігінен жүзетін теңіз жүйелері саласында ынтымақтастық келісіміне қол қойды.
Эр-Риядта өткен Дүниежүзілік қорғаныс көрмесі аясында жасалған келісім Сауд Арабиясында өздігінен жүзетін теңіз жүйелерін жобалау, әзірлеу, өндіру, жүйелік интеграция және техникалық қызмет көрсету салаларында жан-жақты ынтымақтастық орнатуды көздейді.
Бұл салада алғаш рет Сауд Арабиясында жасалған бұл келісім елдің теңіз және қорғаныс мүмкіндіктерін едәуір күшейтеді. Сондай-ақ «Vision 2030» мақсатымен үйлесімді болады.
«ULAQ Global» компаниясының директорлар кеңесінің мүшесі Керем Калафатоғлу Aнадолы агенттігіне берген сұхбатында екі компания арасындағы келісім ең алдымен бірлескен әзірлеме, технология алмасу және өздігінен жүзетін суүсті көліктерін өндіруге бағытталғанын айтты.
«Біздің қызметіміз тек Сауд Арабиясымен шектелмейді, бүкіл әлем бойынша жалғасады. Бұл бастама бізге тұрақты табыс табуға мүмкіндік береді және «ULAQ» өнімдерін тек Сауд Арабиясына ғана емес, әлемнің басқа елдеріне де экспорттауды мақсат етеміз», - деді Калафатоғлу.
Түркиялық компания жылдар бойы жинақтаған тәжірибесін саудиялық серіктесімен бөлісіп, Сауд Арабиясында жергілікті өздігінен жүзетін суүсті көлігі өндірісін дамытуға үлес қосады.
Керем Калафатоғлу: «Біздің жұмыстарымыз осы жерде, Еуропада және АҚШ-та жалғасуда. Біз «ULAQ Global» компаниясын жаһандық деңгейде дамытуға ұмтыламыз», - деді.
