Анадолы агенттігінің хабарына қарағанда, Франция Сыртқы істер министрі Жан-Ноэль Барро Израильдің «Жаһандық Сумуд флотилиясы» белсенділеріне көрсеткен қатыгездігіне байланысты осы елдің оңшыл радикалды Ұлттық қауіпсіздік министрі Итамар Бен-Гвирдің Франция аумағына кіруіне тыйым салынғанын мәлімдеді.
Барро «X» әлеуметтік желісіндегі парақшасында жасаған мәлімдемесінде «Бүгіннен бастап Итамар Бен-Гвирдің Франция аумағына кіруіне тыйым салынды. Бұл шешім "Жаһандық Сумуд флотилиясының" құрамындағы Франция және Еуропа азаматтарына қарсы жасалған жағымсыз әрекеттерден кейін қабылданды», — деп жазды.
Израильдің белсенділерге көрсеткен қиянатына тоқталған Барро «Бұл жағдай палестиналықтарға қарсы өшпенділік пен зорлық-зомбылықты өршітетін, қоғамды дүрліктірген ұзақ мәлімдемелер мен іс-әрекеттер тізбегінен кейін болып отыр», — деді.
Барро сондай-ақ Еуропалық Одақтың да Бен-Гвирге қарсы санкциялық шешім қабылдағанын қалайтынын жеткізді.
«Жаһандық Сумуд флотилиясының» әрекетін «пайдасыз» деп сипаттаған Барро «Дегенмен біз Франция азаматтарының қорқытылуын, сескендірілуін және оларға қоқан-лоқы (зорлық) көрсетілуін, әсіресе мұның мемлекеттік лауазымды тұлға тарапынан жасалуын ешқашан қабылдай алмаймыз», — деп баса айтты.
Бен-Гвир жариялаған бейнежазба
Бен-Гвир «X» әлеуметтік желісіндегі жеке парақшасында белсенділер жеткізілген Ашдод портында Израиль қауіпсіздік күштерінің оларға қатыгездік көрсеткен сәті түсірілген видеоны жариялаған болатын.
Бейнежазбада Бен-Гвир өтіп бара жатқан тұста бір әйел белсендінің «Еркін Палестина» деп айқайлағаны, ал Израиль полициясының әйелге күш қолданып, жерге сұлатып жатқаны таспаға түскен. Осы сәтте оңшыл радикалды Бен-Гвирдің «Міне, дәл осылай істеу керек», — деп айтқаны анық естіледі.
