Индонезияда 7,4 балдық жер сілкінісі болды, 1 адам қаза тапты
Малуку теңізінде болған 7,4 баллдық жер сілкінісі аймақтық цунами ескертулеріне себеп болды. Билік өкілдері адам шығынын растау және құрылымдық зақымдарды есептеу жұмыстарын жүргізіп жатыр.
Бейсенбі күні таңертең ерте Индонезияның шығысындағы Малуку теңізінің солтүстігінде 7,4 баллдық жер сілкінісі болды. Кем дегенде бір адам қаза тауып, аймақтың кейбір бөліктерінде цунами қаупі жарияланды.
“Antara News” агенттігінің хабарлауынша, адам шығыны Манадо қаласында тіркелген. Индонезияның “Metro TV” телеарнасы құрбанның құлаған үйінділердің астында қалып көз жұмғанын хабарлады. Түсірілімдерде аймақтағы ғимараттардың зақымдалғаны көрінеді.
АҚШ-тың цунамиден сақтандыру жүйесі жер сілкінісінің ошағынан 1000 шақырым радиуста толқын көтерілуі мүмкін екенін және бұл Индонезия, Филиппин және Малайзия жағалауларына әсер етуі ықтимал екенін мәлімдеді. АҚШ Геологиялық қызметінің мәліметінше, жерасты дүмпуі 35 шақырым тереңдікте болған, ошағы Тернате қаласынан батыс-солтүстік-батысқа қарай шамамен 127 шақырым жерде орналасқан. Қала халқының саны 205 000-нан асады.
Іздестіру-құтқару жұмыстары жалғасуда
Индонезияның Ұлттық апаттарды басқару агенттігінің басшысы Абдул Мухари Солтүстік Сулавесидегі Манадо мен Битунгта, сондай-ақ Солтүстік Малукудегі Тернатеде топтардың ғимараттарды тексеріп, қосымша шығындардың бар-жоғын тексеріп жатқанын хабарлады.
Мухари Австралияның “ABC News” арнасына берген мәлімдемесінде әр аймақтағы зардап шеккендер саны мен зақымдарды нақтылау үшін әлі де деректер жинап жатқандарын айтты. Ол аймақтық агенттіктерден адам шығыны туралы алдын ала ақпарат түскенін, бірақ нақты сан кейінірек берілетінін жеткізді.
Манадо тұрғындарының бірі адамдардың үрейленіп үйлерін тастап шыққанын, өз ауданында айтарлықтай зақым болмаса да, заттардың жерге құлап, жарықтың өшіп қалғанын айтты. Тернате мен тарихи Дәмдеуіш аралдарының бөлігі болып табылатын Тидоре сияқты бірнеше аймақтың билігі тұрғындарға ықтимал эвакуацияға дайын болуды ескертті.
Индонезия тектоникалық плиталар тоғысатын, жер сілкіністері жиі болатын және жанартаулық белсенділік жоғары Тынық мұхитындағы «Отты шеңберде» орналасқан.