Сирияда көптеген отбасы әл-Актан түрмесінде жоғалған жақындарын іздестіруде. Аталған түрме сейсенбі күні Сирия армиясының бақылауына өтіп, бұған дейін нысанды бақылауда ұстаған YPG құрылымдары мен бұрынғы режимге қатысы бар топтар аймақтан шығарылған.
52 жастағы Хинд әл-Ард сәрсенбі күні журналистерге 18 жастағы ұлының YPG тарапынан бір жарым жылға сотталғанын, ал соңғы жеті ай бойы Сирия армиясымен байланысы бар деген айыппен қамауда ұсталғанын айтты.
Оның сөзінше, ол тек ұлын ғана емес, түрме аумағынан тыс жерде жоғалып кеткен бауырын да іздеп жүр. Бұған дейін үш рет ұлын көруге рұқсат берілгенін айтқан әл-Ард соңғы бір айда түрме маңына жақындауына тыйым салынғанын және Жаңа жыл кезеңінде баласын көре алмағанын жеткізді.
Әл-Актан түрмесінде не болды?
Әл-Актан түрмесі Сирияның Ракка қаласының орталығынан солтүстік-шығысқа қарай шамамен 10 шақырым жерде орналасқан. Бұған дейін бұл мекемеде ДАИШ-пен байланысы бар кейбір адамдар да ұсталғаны хабарланған, ал нысан YPG бақылауында болған.
Сирия армиясы түрменің бақылауын өз қолына алғаннан кейін аймақта қарулы қақтығыстар тіркелді. Қақтығыстардан кейін YPG күштері ішкі аумақта болған тұтқындарды босатып, аймақтан шегінген.
Сейсенбі күні Сирия Қорғаныс министрлігі түрме аумағында қауіпсіздік толық орнатылғанын және қауіпсіздік күштері нысан төңірегіне орналастырылғанын растады.
Сондай-ақ Сирия Президенті аппараты Хасеке аймағының болашағына қатысты YPG тарапымен «өзара түсіністікке» қол жеткізілгенін мәлімдеді.
Қорғаныс министрлігі жергілікті уақыт бойынша сейсенбі күні сағат 20:00-де (GMT бойынша 17:00) күшіне енген төрт күндік атысты тоқтату режимі жарияланғанын хабарлаған болатын.
