Америка Құрама Штаттарының президенті Дональд Трамп Газа Бейбітшілік кеңесін құру үдерісі жүріп жатқанын және кеңес құрамына әлемдегі ең маңызды мемлекеттердің басшылары кіретінін мәлімдеді.

Трамп жексенбі күні ұшақта журналистерге берген мәлімдемесінде «Бейбітшілік кеңесі құрылуда. Негізінен ең маңызды мемлекеттердің көшбасшылары болады», - деді.

Ол бастамаға қосылуға халықаралық деңгейде зор қызығушылық барын атап өтіп, «Барлығы бұл құрылымның ішінде болғысы келеді», - деп қосты.

Трамптың төрағалық етуі күтілетін және әлемнің 15 көшбасшысын қамтитын бұл кеңес кейінірек құрылатын палестиналық технократ үкіметтің жұмысын қадағалап, Газадағы қайта қалпына келтіру үдерісін бақыламақ.

Кеңеске қатысады деп күтілетін елдер қатарында Ұлыбритания, Германия, Франция, Италия, Сауд Арабиясы, Катар, Мысыр және Түркия бар. БҰҰ-ның Таяу Шығыс бойынша бұрынғы арнайы өкілі Николай Младеновтың Бейбітшілік кеңесінің жергілікті өкілі ретінде қызмет атқаруы мүмкін екені хабарланды.

Кеңестің осы апта жарияланатыны туралы ақпаратқа қарамастан Трамп нақты мерзім берген жоқ. Трамп әкімшілігі Бейбітшілік кеңесін өткен айда таныстыруды жоспарлағанын, алайда бұл хабарландыру бірнеше рет кейінге шегерілгенін білдірді.

Израиль 2023 жылдың қазан айынан бері Газада 71 мыңнан астам палестиналықты өлтіріп, 170 мыңнан астам адамды жаралады. Олардың басым бөлігі әйелдер мен балалар.