АҚШ-тың Мемлекеттік хатшысы Марко Рубио мен Қытайдың Сыртқы істер министрі Ван И жұма күні сауда, қорғаныс және басқа да мәселелер шиеленіскен тұста Малайзияда алғаш рет бетпе-бет кездесу өткізеді.
Кездесу Куала-Лумпур қаласында өтіп жатқан Оңтүстік-Шығыс Азия елдері қауымдастығының (АСЕАН) Сыртқы істер министрлері жиналысының аясында өтеді деп хабарлады «The Washington Post». Бұл кездесу екі ел қарым-қатынасындағы маңызды бетбұрыс болуы мүмкін.
АҚШ пен Қытай Оңтүстік-Шығыс Азия елдері қауымдастығының мүшесі болмаса да, Оңтүстік-Шығыс Азия елдерімен тығыз байланыс орнатуға тырысып келеді. Алайда аймақтағы көптеген ел екі жаққа да сақтықпен қарайды.
Рубио мен Ван жұма күні түстен кейін кездеседі деп жоспарланған.
Бейсенбі күні Рубио Ванмен кездесуде Қытайдың Украинадағы соғысқа қатысты Ресейге көрсеткен қолдауын талқылауды жоспарлап отырғанын айтты.
«Қытайлықтар Ресейдің әрекеттерін қолдағаны анық. Негізі олар қолдаулары анықталғанша көмек көрсетуге дайын болды деп ойлаймын». - деді Рубио Ресейдің Сыртқы істер министрі Сергей Лавровпен кездесуінен кейін.
14 жыл бойы республикашыл сенатор ретінде Қытайға қатысты қатаң ұстанымымен танылған Рубио 2020 жылы Пекин тарапынан қара тізімге енгізілген және әлі де санкция салынғандар тізімінде тұр. Ол қаңтар айында Мемлекеттік хатшы қызметіне кіріскеннен кейін Ванмен телефон арқылы сөйлескен.
