Франция соты дүйсенбі күні Марин Ле Пенді қаржы жымқыру ісі бойынша кінәлі деп тапты, бірақ оның жазасы қандай болатынын және бұл ультраоңшыл көшбасшының саяси болашағына қалай әсер ететінін бірден жариялаған жоқ.
Париж сотының алдыңғы қатарында отырған Ле Пен бас судья үкімді оқыған кезде ешқандай реакция білдірмеді. Судья сондай-ақ Ле Пен сияқты Еуропа Парламентінде депутат болған оның партиясының сегіз мүшесін кінәлі деп тапты.
Ле Пен мен онымен бірге айыпталғандар 10 жылға дейін бас бостандығынан айырылуы мүмкін. Олар апелляцияға шағымдана алады, бұл жаңа сот процесіне әкеледі.
Ле Пен үшін ең үлкен алаңдаушылық ол апелляцияға шағымданса да, сот оны «бірден» сайлауға қатысуға жарамсыз деп жариялауы болады.
Бұл оны 2027 жылы президенттікке үміткер болудан айыруы мүмкін. Ол мұндай жағдайды «саяси өлім» деп сипаттады.
Ле Пен мен оның Ұлттық одақ партиясынан 24 басқа шенеунік 2004-2016 жылдар аралығында Еуропалық Одақ парламентінің көмекшілеріне арналған ақшаны партия қызметкерлеріне төлеу үшін пайдаланған деп айыпталды, бұл 27 елден тұратын блоктың ережелерін бұзады.
Ле Пен мен қасындағылар кінәсін мойындамады.
56 жастағы Ле Пен 2017 және 2022 жылдардағы президенттік сайлауда Президент Эммануэль Макронға қарсы екінші орын алған, ал оның партиясын қолдаушылар саны соңғы жылдары өсті.
Ле Пеннің орнына Джордан Барделла келе ме?
2024 жылдың соңында өткен тоғыз апталық сот процесі барысында Ле Пен сайлауға жарамсыз деп танылу «мені президенттікке үміткер болу құқығынан айырады» деп мәлімдеді.
«Мен өкілдік ететін қозғалысқа 11 миллион адам дауыс берді. Ертең мүмкін миллиондаған француз өздерінің сайлаудағы үміткерінен айырылуы мүмкін», – деді ол үш судьядан тұратын алқаға үн қатып.
Егер Ле Пен 2027 жылы сайлауға түсе алмаса, оның табиғи мұрагері ретінде 2021 жылы партияның басшылығына келген 29 жастағы Джордан Барделла алға шығуы мүмкін.
Ле Пен Еуропа Парламентінің ақшасын өз партиясына пайда әкелу үшін «жүйе» құруда басшылық етті деген айыптауларды жоққа шығарды. Оның орнына ол көмекшілердің Еуропа Парламентінен төленетін жұмысын депутаттардың қажеттіліктеріне, соның ішінде партияға қатысты саяси жұмыстарға бейімдеу орынды деп мәлімдеді. Ол кезде партия Ұлттық фронт деп аталған.
Сот тыңдаулары барысында Еуропа ақшасының бір бөлігі Ле Пеннің жеке оққағарына – бір кездері оның әкесінің оққағары болған адамға және жеке көмекшісіне төленгені анықталды.
Прокурорлар Ле Пенге екі жылға бас бостандығынан айыру және бес жылға саяси тыйым салу жазасын талап етті.
Ле Пен соттың жалғыз мақсатының оны президенттік сайлаудан алыстату екенін сезінетінін айтты.
