Сауд Арабиясының энергетика министрі Абдулазиз бен Салман елінің қандай жағдай болмасын әлемдік нарықты энергия ресурстарымен үздіксіз қамтамасыз етуге бел буғанын және кез келген қиындықты еңсере алатынын мәлімдеді.

Министр Эр-Риядта өткен 17-Халықаралық энергетикалық форумның министрлер кездесуінің (IEF17) ашылуында сөз сөйлеп, «Сауд Арабиясы энергия ресурстарын сенімді жеткізуге, инвестиция салуды жалғастыруға және түрлі қиындықтарға қарсы тұруға қабілетті екенін дәлелдеді», – деді.

Министр: «Біздің жігерімізді ешкім жасыта алмайды. Біз күлден қайта түлейтін Феникс құсы сияқтымыз. Сондықтан Сауд Арабиясы, әсіресе Эр-Рияд қаласын энергетикалық қауіпсіздіктің астанасы», – деді.

Инфрақұрылым тұрақтылығы

Абдулазиз Сауд Арабиясының қиын жағдайларда да энергия ресурстарын үздіксіз жеткізу қабілетінің маңызды мысалы ретінде стратегиялық маңызы бар Шығыс–Батыс мұнай құбырын атап өтті. Бұл құбыр Қызыл теңіз жағалауындағы Янбу қаласы арқылы әлемдік нарыққа мұнайды теңіз жолымен экспорттаудың балама бағытын қамтамасыз етеді.

Министр 6 қазанда жасаған мәлімдемесінде бұл құбыр арқылы тәулігіне 5,8 миллион баррель мұнай тасымалданатынын растады.

Халықаралық ынтымақтастық пен тұрақтылықтың маңызын атап өткен министр энергетикалық қауіпсіздікті қамтамасыз ету бір елдің ғана қолынан келмейтін, барлық мемлекетке ортақ жауапкершілік екенін ескертті.

Сондай-ақ Эр-Рияд билігінің мұнай мен газды, жаңартылатын энергия көздерін, атом және геотермалдық энергетиканы қамтитын кешенді энергетикалық стратегияны жүзеге асырып жатқанын мәлімдеді.