АҚШ Әділет департаменті екі қытайлық азаматты Қытай үкіметінің заңсыз агенті ретінде әрекет етті деп айыптады.
Департаменттің сәрсенбі күні жасаған мәлімдемесінде аталған азаматтардың АҚШ әскери қызметкерлерінен ұлттық қауіпсіздікке қатысты мәліметтерді алуға тырысқаны хабарланды.
Юанцэ Чэнь (38 жаста) және Лирен “Райан” Лай (39 жаста) атты күдіктілер жұма күні тұтқындалып, дүйсенбі күні алғаш рет Хьюстон (Техас) және Портленд (Орегон) қалаларындағы сот алдына шығарылды.
Олар Қытайдың басты азаматтық барлау агенттігі Мемлекеттік қауіпсіздік министрлігі атынан АҚШ аумағында құпия барлау операцияларын жүргізді деп айыпталуда.
Прокурорлардың айтуынша, Чэнь мен Лай АҚШ әскери күштеріне қатысты құпия ақпаратты жинауға, Әскери-теңіз күштері туралы барлау мәліметтерін алуға, сондай-ақ әскери қызметкерлерді Қытай барлау әрекеттеріне көмектесу үшін жұмысқа алуға тырысқан.
«Қауіпсіздікті бұзуға бағытталған агрессивті әрекеттер»
Бас прокурор Памела Бонди бұл істі Пекиннің АҚШ қорғанысын іштен әлсіретуге бағытталған кең ауқымды стратегиясының бір бөлігі ретінде сипаттады. Бонди мәлімдемесінде: «Бұл іс Қытай үкіметінің армиямыздың ішіне жасырын кіріп, ұлттық қауіпсіздігімізді іштен әлсіретуге деген тұрақты әрі агрессивті талпынысын көрсетеді»,-деді.
Федералдық тергеу бюросының директоры Каш Пател Әділет департаментінің алаңдаушылықтарын қайталап, агенттіктің АҚШ-қа бағытталған шетелдік барлауды болдырмау әрекеттерін атап өтті.
Пател: «Қытайдың шекараларымызға енуге бағытталған әрекеттеріне қарсы елімізді мұқият қорғауды жалғастырамыз»,-деп қосты. Қытайдың АҚШ-тағы елшілігі әзірге жауап берген жоқ.
