Палестина үкіметіне қарасты мекеме дүйсенбі күні Израиль күштері мен заңсыз қоныстанушылардың шілде айында басып алынған Батыс Шерияның түкпір-түкпірінде палестиналықтар мен олардың мүлкіне 2 мың 256 шабуыл жасағанын хабарлады.
Палестинаның Қоныстандыру комиссиясының ай сайынғы есебіне сәйкес, шабуылдардың 1 мың 458-ін Израиль әскері, ал 798-ін заңсыз қоныстанушылар жасаған.
Комиссия төрағасы Муайяд Шаабан Рамалла мен әл-Бирада – 260, Наблуста – 247, Дженинде – 190, Бейт-Лахмда – 185 және әл-Халилде 170 рет Израиль күштерінің шабуылдары тіркелгенін мәлімдеді.
Заңсыз қоныстанушылардың шабуылдарын «рекордтық көрсеткіш» деп атаған Шаабан Наблуста 228, әл-Халилде 212, ал Рамалла мен әл-Бирада 153 оқиға тіркелгенін айтты. Оның сөзінше, жыл басынан бері заңсыз қоныстанушылар палестиналықтарға қарсы 4 мың 286 шабуыл жасаған.
Шаабан шілде айындағы шабуылдардан жеті палестиналықтың қаза тапқанын, олардың төртеуі Наблустың батысындағы Телл ауылына заңсыз израильдік қоныстанушылар шабуыл жасаған кезде мерт болғанын мәлімдеді.
Есепке сәйкес, заңсыз израильдік қоныстанушылар 3 мың 241 зәйтүн ағашымен бірге барлығы 5 мың 27 ағашты тамырымен жұлып, зақымдаған немесе улаған. Сондай-ақ палестиналықтардың мүлкі мен егіс алқаптарына 440 рет шабуыл жасап, 23 рет мүлкін ұрлаған немесе тартып алған.
Есепте заңсыз қоныстанушылардың бір ай ішінде 29 жаңа бекет құруға әрекет жасағаны да айтылды. Ал Израиль билігі палестиналықтарға тиесілі 1 миллион 172 мың шаршы метр аумақта 1 мың 128 жаңа тұрғын үй салу жоспарын мақұлдаған.
Үйлерді қирату жалғасуда
Бұдан бөлек Израиль күштері дүйсенбі күні басып алынған Батыс Шерияда құрылыс рұқсаты жоқ деген сылтаумен бір үй мен жылқы фермасын және ауыл шаруашылығына арналған екі нысанды қиратты.
Жергілікті белсенді Жиһад әл-Кактың айтуынша, Израиль күштері Рамалланың шығысындағы Кафр-Малик елді мекенінде салынып жатқан аумағы 140 шаршы метр үйді және 460 шаршы метрлік жылқы фермасын бұзған.
Жергілікті дереккөздердің хабарлауынша, Наблустың шығысындағы Бейт-Дажан елді мекенінде Израиль күштері ауыл шаруашылығына арналған екі нысанды қиратқан. Соның салдарынан елді мекеннің бір бөлігінде электр жарығы өшкен.
Комиссияның мәліметінше, Израиль билігі шілде айында палестиналықтарға тиесілі шамамен 831 мың шаршы метр жерді қамтитын 31 әскери тәркілеу туралы бұйрық шығарған. Сондай-ақ 80-і тұрғын үй ретінде пайдаланылған 165 нысанға қатысты 80 қирату операциясын жүргізген.
Палестина билігінің деректеріне сәйкес, Шығыс Иерусалиммен бірге басып алынған Батыс Шерия аумағында шамамен 750 мың заңсыз қоныстанушы 156 қоныс пен 360 қоныстану бекетінде тұрады.
Палестинаның ресми мәліметтеріне қарағанда, 2023 жылдың қазанында Израильдің Газаға қарсы соғысы басталғаннан бері басып алынған Батыс Шерияда Израиль әскерінің рейдтері мен заңсыз қоныстанушылардың шабуылдары күшейген. Соның салдарынан 1 мың 182-ден астам палестиналық қаза тауып, шамамен 13 мың адам жараланған және 24 мыңға жуық адам тұтқындалған.
