Оңтүстік-Шығыс Азия елдерінен тұратын ASEAN және Қытай еркін сауда келісімін цифрлық экономика, жасыл экономика және өзге де жаңа салаларды қамтитын жаңартқан жаңа келісімге қол қойды.

11 мүшеден тұратын Оңтүстік-Шығыс Азия халықтарының қауымдастығы (ASEAN) — Қытайдың ең ірі сауда серіктесі. ASEAN статистикасына сәйкес, екі тарап арасындағы сауда көлемі өткен жылы 771 миллиард АҚШ долларына жеткен.

Қытай жалпы ішкі өнімі 3,8 триллион доллар болатын ASEAN аймағымен байланысын күшейтуге ұмтылуда. Бұл қадам АҚШ президенті Дональд Трамп әкімшілігінің әлем елдеріне енгізген жоғары импорттық тарифтеріне жауап ретінде бағалануда.

Пекин өзге ірі державалар сирек жер элементтері мен басқа да маңызды минералдар экспортына шектеу қойғаны үшін сын айтқанымен өзін ашық экономика ретінде көрсетуге тырысуда.

ASEAN мен Қытай арасындағы еркін сауда келісімінің үшінші нұсқасы Малайзияда өткен саммитте күшіне енді. Саммитке Азия сапарының басында Дональд Трамп та қатысты.

Ықтимал қорғаныс тетігі

ASEAN мен Қытай арасындағы келісімді жаңарту жөніндегі келіссөздер 2022 жылдың қарашасында басталып, биыл мамыр айында (Трамптың тарифтік саясаты күшейген кезеңде) аяқталды. Екі тарап арасындағы алғашқы еркін сауда келісімі 2010 жылы күшіне енген болатын.

Қытай бұл келісім ауыл шаруашылығы, цифрлық экономика және фармацевтика салаларында нарыққа қолжетімділікті жақсартатынын бұған дейін айтқан болатын.

Қытай да, ASEAN да Аймақтық жан-жақты экономикалық әріптестік (RCEP) ұйымының (әлем халқының шамамен үштен бірін және жаһандық жалпы ішкі өнімнің шамамен 30 пайызын қамтитын әлемдегі ең ірі сауда ұйымы) мүшелері болып табылады.

Малайзия бес жылдық үзілістен кейін алғаш рет Куала-Лумпурда RCEP саммитін өткізді.

Кейбір сарапшылар бұл бірлестікті АҚШ енгізген тарифтерге қарсы ықтимал «аралық механизм» ретінде қарастырды, алайда мүшелер арасындағы келіспеушіліктерге байланысты оның ережелері өзге аймақтық сауда келісімдеріне қарағанда әлсіз деп бағаланады.