БҰҰ Бас хатшысы Антониу Гутерриш Судандағы азаматтарға ауыр зардап тигізіп жатқан соғыстың үшінші жылына аяқ басқанын ескертіп, қақтығысты тоқтату үшін жаһандық әрекетке шақырды.
«Екі жылға созылған қасіретті соғыс кезінде Судан үлкен дағдарысқа тап болды, ал ең ауыр зардапты қарапайым халық тартып отыр», – деді Гутерриш дүйсенбі күні жасаған мәлімдемесінде. Ол базарларға, ауруханаларға, мектептерге және қоныс аудару орындарына жасалған шабуылдарды айыптады.
«Шамамен 12 миллион адам үйлерін тастап кетуге мәжбүр болды, бұл әлемдегі ең үлкен қоныс аудару дағдарысына айналды», – деді хатшы. Оның ішінде 3,8 миллионнан астам адам көрші елдерге бас сауғалаған.
30 миллионнан астам адам гуманитарлық көмекке мұқтаж, оның ішінде 25 миллионы аштыққа тап болып отыр. Ол сондай-ақ кем дегенде бес аймақта ашаршылық анықталғанын және бұл көрсеткіш жоғарылауы мүмкін екендігін ескертті.
Мәлімдемеде Гутерриш қақтығыс басталғаннан бері кем дегенде 90 гуманитарлық қызметкердің қаза тапқанын айтып, жауапкершілікке шақырды.
«Барлық құқық бұзушылықтар мен зорлық-зомбылық туралы есептер бойынша тәуелсіз, бейтарап және ашық тергеулер жүргізу өте маңызды», – деді ол. Нақты саяси әрекетке шақырған Гутерриш «Азаматтарды қорғаудың жалғыз жолы – мағынасыз қақтығысты тоқтату. Әлем Судан халқын ұмытпауы керек», – деп баса айтты.
Сондай-ақ Гутерриш БҰҰ арнайы өкілі Рамтан Ламамра басқаратын бейбітшілік орнату әрекеттерін қолдауға дайын екенін мәлімдеді.
2023 жылдың 15 сәуірінен бастап Жылдам Қолдау Күштері мен Саудан армиясы Суданда бақылауды қолға алу үшін шайқасуда. Бұл қақтығыс мыңдаған адамның өліміне және әлемдегі ең ауыр гуманитарлық дағдарыстардың біріне әкелді.
БҰҰ мен жергілікті биліктің мәліметтері бойынша Суданда 20 мыңнан астам адам қаза тауып, 15 миллион адам қоныс аударған. Ал АҚШ зерттеушілерінің деректері бойынша өлім саны шамамен 130 мыңға жеткен.
Елден қашқандардың көпшілігі негізінен Эфиопия, Мысыр, Орталық Африка Республикасы және Чадқа бет алған.
