Түркия Республикасының Сыртқы істер министрі Хакан Фидан бейсенбі күні жасаған мәлімдемесінде Түркияның Иранға бағытталған «кез келген әскери операцияға» қарсы екенін мәлімдеп, Тегеранды «өз ішкі мәселелерін өз бетінше шешуге» шақырды.

Министр Фидан бұл мәлімдемелерін Стамбулда журналистермен кездесуі кезінде айтты. Мәселенің халықаралық қатынастар өлшемі бар екенін атап өткен Фидан Тегеранның кейбір саясаттары салдарынан «санкцияларға ұшырағанын» да қоса кетті.

Ирандық әріптестерін аймақтық елдермен арадағы мәселелерді шешуге шақырғанын білдірген Фидан былай деді: «Экономикалық қиындықтарға әкеп соқтыратын кейбір құрылымдық мәселелерді жою үшін, жаһандық ядролық мәселедегі түйткілдерді ешқандай мүмкіндікті жіберіп алмай, дипломатия жолымен шешуі керек».

Фидан бір ел халықаралық оқшаулауда болған кезде белгілі бір экономикалық қызметтерді ұсынудың шектелетініне тоқталып, «Иранның халық саны көп және қоғамы серпінді. Өмір сүруге және әлеуметтік өмірге араласуға деген құлшынысы өте жоғары, білікті мамандары бар. Осындай қоғамды белгілі бір мүмкіндіктерден айырғанда, осындай мәселелер туындайды. Мұндағы шатастырылатын тұс мынау: адамдардың экономикалық және басқа да қиындықтарға байланысты көрген тауқыметі режимге қарсы идеологиялық көтеріліс сияқты көрінуі мүмкін; іс жүзінде бұл жағдай «сұр аймақты» құрайды», — деді.