БҰҰ Бас Ассамблеясы жұма күні Нью-Йорк декларациясын қолдайтын қарар қабылдады. Бұл декларация Палестина мемлекетін мойындауды және Израиль-Палестина қақтығысын шешу үшін екі мемлекет шешімін ілгерілетуді көздейді.
Ресми түрде “Палестина мәселесін бейбіт жолмен шешу және екі мемлекет шешімін жүзеге асыру бойынша Нью-Йорк декларациясын қолдау” деп аталатын бұл қарарды 142 ел қолдап, 10 ел қарсы болып, 12 ел қалыс қалды.
Франция мен Сауд Арабиясы ұсынған бұл декларацияға шілде айында Нью-Йорктегі БҰҰ штаб-пәтерінде өткен халықаралық конференция барысында 17 мүше мемлекетпен бірге қол қойылған болатын.
“Бұл декларация 2025 жылдың 28-30 шілдесінде Нью-Йоркте өткен конференция барысында жасалған жұмыстардың нәтижесі болып табылады және жұмыс топтарының 17 тең төрағасымен бірлесіп дайындалды,” - деді Францияның БҰҰ-дағы тұрақты өкілі Жером Боннафон. Ол “Бұл декларация екі мемлекет шешімін жүзеге асыру үшін бірыңғай жол картасын ұсынады.” деді.
Палестинаның БҰҰ-дағы тұрақты өкілі Мансур декларацияны қолдаған барлық елдерге алғысын білдіріп, “Бейбітшілікті қалайтындар, бізге қосылыңыздар. Өмірді сақтап қалғысы келетіндер, бізге қосылыңыздар,” - деді.
Израиль мен АҚШ бұл қарарға қарсы шықты. Израильдің БҰҰ-дағы елшісі Дэнни Данон: “Бұл декларацияны қолдау бейбітшілік орнатуға шынайы талпыныс емес,” - деді.
АҚШ өкілі Морган Ортагус бұл мәтін “қақтығысты тоқтату бойынша маңызды дипломатиялық күш-жігерді әлсіретеді” және “Хамасты күшейтіп, бейбітшілікке қол жеткізу мүмкіндігін қиындатты” деп мәлімдеді.
